Орталық коммуникациялар қызметі алаңында брифинг өткізген «Bilim Media Group» ЖШС компаниясының негізін қалаушы және басшысы Рауан Кенжеханұлы Мемлекет басшысының тапсырмасына орай әзірше 20-ға жуық оқулық аударылып жатқанын атап өтті. «Аударма – күрделі әрі жауапты жұмыс. Жоғары оқу орындарының студенттеріне арналған оқулықтар қазақ тіліне сапалы әрі түсінікті аударылуы керек. Сондықтан осы іске қызығушылық танытқан аудармашыларды, ұстаздарды, әдеби редакторлар мен ғылыми сарапшыларды арнайы жобаға белсене қатысуға шақырамыз. 23 тамыз күні Алматыда қазіргі аударма ісінің теориясы мен практикасына арналған алқалы жиын өткіземіз. Жобаға жанашырлық білдірген қауымды конференцияға қатысуға шақырамыз. Олардың ұсыныс-пікірлері біз үшін маңызды», дейді Р.Кенжеханұлы.
Оның айтуынша, бүгінде алғашқы оқулықтарды жазуға 90-ға жуық маман тартылыпты. Олардың дені өз саласын жетік меңгерген университет оқытушылары екен.
Жалпы кітаптар, Президент атап өткендей, тарих, саясаттану, әлеуметтану, философия, психология, мәдениеттану және филология ғылымдары бағытында жарық көрмек. Бұл оқулықтардың басым көпшілігі бұрын-соңды қазақ тіліне, тіпті орысшаға аударылмаған жаңа басылымдар. Атап айтқанда, Грегори Мэнкьюдің «Экономикс», Джордж Ритцердің «Қазіргі әлеуметтану теориясы», Эллиот Аронсонның «Әлеуметтік психологияға кіріспе», Реми Хестің философияға арналған кітаптары, тағы басқалар бар.
Қазақ тілінде сөйлейтін кітаптарға қойылатын талап та қатал. Әрбір кітапқа жеке жұмыс комиссиясы құрылған. Оқулықтар өміршеңдігін дәлелдеген, қазіргі күні әлемнің беделді оқу орындарының педагогикалық тәжірибесінде кеңінен пайдаланылып келе жатқан, әбден сүзгіден өтіп, бірнеше мәрте баспадан шығарылған болуы тиіс. Сондай-ақ, белгілі бір пәннің мазмұны мен мәнін ашатын, сол ғылымның идея-
лары мен тұжырымдамаларын дәл сипаттайтын өзекті оқулық болғаны ләзім.
Бұйыртса, рухани жаңғыру аясындағы «Қазақ тіліндегі 100 жаңа оқулық. Жаңа гуманитарлық білім» жобасындағы оқулықтардың алғашқы легі 2018-2019 оқу жылында студенттердің қолына тиіп, университеттер осы кітаптармен мамандар даярлай бастайды.
Ал қазақ тіліндегі оқулықтар жобасымен танысқысы келетіндер kitap.kz сайтына кіріп, ұсыныс-пікірін қалдыруға болады.
Қымбат ТОҚТАМҰРАТ