«Министрлік темір жол көлігімен көмір және астық, сондай-ақ өзге де әлеуметтік маңызы бар жүктер тасымалына айрықша назар аударуда. Бүгінде ашық вагондар паркі 50 мыңға жуықтады. Биылғы мамырдан бастап жылу беру маусымына дайындық аясында 31 млн тоннадан астам көмір тасымалданды, бұл өз кезегінде жоспарлы көлемнің 98 пайызы», дейді комитет өкілі. Оның сөзіне қарағанда, астық тасымалдау шаралары қызу жүріп жатқан кезеңде жылжымалы құрамның жетіспеуі байқалуы мүмкін.
Бүгінде астықты тасымалдауға шамамен 10 мың вагон жұмылдырылған. Олар айына 1 млн тонна астық тасымалдауды қамтамасыз етеді. Қазіргі кезде Ауыл шаруашылығы министрлігімен бірлесе астық тасымалдайтын вагондардың санын арттыру мәселесі пысықталуда. Осы орайда жыл соңына дейін астық тасымалы көлемін арттыру көзделген. «Бұл тұрғыда қосымша 1 мың вагонды Ресейден жеткізбек ойдамыз. 2017 жылдың 9 айында шамамен 5,5 млн тонна астық тасымалданды, оның ішінде 3,6 млн тонна экспортқа шығарылды. Қазан айына қарастырылған астық тиеу көлемі 850 мың тоннаны құрап, соның 600 мың тоннасы экспортқа тиесілі. Қараша-желтоқсанда тасымалданатын астық 1 млн тоннаға дейін жетеді, оның ішінде 650 мың тоннасы экспортқа бағытталады», деді Д.Потлов.
Комитет төрағасының орынбасары жүк тасымалына отандық жаңа вагондар тартылып жатқанын әңгімеледі. Былтырғы қазан айынан вагондарды сатып алу ставкасын ішінара субсидиялау есебінен көмір мен кен тасымалдау үшін 1300 ашық вагон және транзиттік контейнерлік тасымалдар үшін 3 103 вагон шығару жөнінде шарттар бекітілген екен. Бұл мақсатқа шамамен 70 млрд теңге инвестиция тартылған. «Сатып алынатын вагондар отандық кәсіпорындарда шығарылады. Жалпы, бұл бағыттағы шаралар темір жол машина жасау саласындағы 7 мың жұмыс орны бар 39 отандық компанияны жұмылдыруға жол ашты», деді ведомство өкілі.
Басқосуда белгілі болғандай, биыл «Тұлпар-Тальго» вагондарының 62 бірлігін сатып алу және келесі жылы Астана – Лениногор 375/376 пойызы құрамын жаңарту жоспарлануда. Жалпы алғанда «Жолаушылар тасымалы» АҚ жыл сайын «Тұлпар-Тальго» вагондарының шамамен 50 бірлігін сатып алмақ. Жеке тасымалдаушылар министрлік алдындағы шарттық міндеттемелері аясында биыл 16 млрд теңге инвестиция тартса, жолаушылар тасымалдауға арналған 52 вагон сатып алған. Ол вагондар 43/44 Қостанай – Алматы, 327/328 Қостанай – Қарағанды, 621/622 Қостанай – Арқалық және 307/308 Жезқазған – Астана пойыздарының ескі вагондарын алмастырады.
Асхат РАЙҚҰЛ,
«Егемен Қазақстан»