Бұрын көп жағдайда елдің экономикасы әңгіме болатын еді. Қазір экономикамыз түзеліп, халықтың әл-ауқаты артты. Ендігі жерде рухани дамуға бет бұра бастадық. Оған Президенттің «Болашаққа бағдар: рухани жаңғыру» мақаласы қуат беріп отыр.
Мақаланың әрбір тарауында айтылатын халықтық іс қай жағынан да жұрт көңілінен шығуда. Әсіресе рухани сананы жаңғырту жөніндегі идеялары жастарды серпілтетіні сөзсіз. Оның ішінде туған жерге деген әр азаматтың сүйіспеншілігі қалай болу керек деген мәселе де жан-жақты қозғалған. «Туған жер – әркімнің шыр етіп жерге түскен, бауырында еңбектеп, қаз басқан қасиетті мекені, талай жанның өмір бақи тұратын өлкесі. Оны қайда жүрсе де жүрегінің түбінде әлдилеп өтпейтін жан баласы болмайды» деген Мемлекет басшысының сөзі бәріміздің рухымызды оятты.
Маңғыстау өлкесінің барлық өсіп-өркендеуі менің көз алдымнан өтіп келеді. Бұған бірер мысал келтіре кетсем артық бола қоймас. Үстіміздегі жылдың тоғыз айының ішінде кәсіпорындар 1626,2 млрд теңгенің өнімін өндіріпті. Мұнай-газ секторы дамып, құрылыс индустриясы артып, аграрлық сала іргелі дамып, туризмге де кең жол ашылды. Айталық табиғи газ өндіру 11,5 пайызға көбейіп отыр. «Нұрлы жол» және «Нұрлы жер» мемлекеттік бағдарламасы аясында да тың істер атқарылып, 665 мың шаршы метр тұрғын үй пайдалануға берілді. Жаңа жұмыс орындары ашылып жатыр. Осындай тың серпіліске облысымызға келген жігерлі әкім Ералы Тоғжанов ұйымдастыру жағынан ұтқырлығымен өзіндік үлесін қосып отырғанын айтқым келеді.
Қазыналы түбектің жұртшылығы рухани салада да тың қадамдарға жол салумен келеді. Н.Жантөрин атындағы облыстық музыкалық драма театр жаңа қойылымдар қойып көрермендерін тәнті етуде. Оған қоса жазуымызды латын графикасына оралту жөніндегі елдік іске де өз үлесімізді қосудамыз. Бұл ұлы Ахмет Байтұрсынұлының қазақ әліпбиін қайтадан жаңғырту деп білемін. Ендігі жерде бұрынғы кеткен қателіктерді жойып қазақ сөзі бұрмаланбай таңбаланып, кейінгі ұрпаққа жетсе нұр үстіне нұр болары анық. Ең бастысы аты-жөнімізді дұрыс жазу шешімін табады деп сенемін. Бұл мемлекеттік мәртебеге ие қазақ тілінің де абыройын асырып, беделін көтерері сөзсіз.
Облыстық «Қазақ тілі» қоғамдық бірлестігі жақында Нұрсұлтан Назарбаевтың «Мәңгілік ел» идеясы мен «100 нақты қадам» – Ұлт жоспары, алда айтқан мақаласын кең ауқымда талдап, оны жүзеге асыру бойынша жиындар, шығармашылық конкурстар өткізіп, жастардың мемлекеттік тілді қолдануына жағдай жасау жайын үнемі күн тәртібінде ұстап келеді.
Мен бұл ойларымды Тұңғыш Президент күніне қарай жазып отырмын. Өйткені Нұрсұлтан Әбішұлымен Астанада да, қазыналы түбекте де жүздесіп ой бөлістім. Ол кісінің бойындағы кемеңгерлік, алысты болжап, келешекті бағдарлайтын алғырлығына да тәнтімін. Әсіресе ана тіліміздің құнарын бұзбай, әрін кетірмей, ұлы бабаларымыздың аталы сөзімен ұштастырып отыратын қасиеті кімге де болса үлгі.
Қалам ұстап ел мен жер тарихын, абзал жандардың елеулі ісін үлкенді кішілі шығармаларыма арқау еткен қаламгер болсам да Елбасымен дидарласқанда ол кісінің айтқан сөздеріндегі әдемі теңеулері қызықтырмай қоймайды. Ел ішінде жүргендіктен жақсымызды жұртқа жеткізуге, азаматтарымыздың ынтымақ тірлігін айтып отыруды өзіме парыз санаймын. Тұңғыш Президент күніне орай бұл ойымды ес білгелі оқып келе жатқан ел газеті арқылы да жұртшылыққа жеткізуге ниет еттім.
Бектұр ТӨЛЕУҒАЛИЕВ,
Қазақстан Жазушылар одағының мүшесі,
Маңғыстау облысының құрметті азаматы
