Жақсы бір танысы 3 миллион теңгеге кондитерлік тағамдар дайындайтын қондырғылар алғанымен жұмысын бастап кетуге қолбайлау көп болып, әрі-сәрі болып жүрсе керек. Ол осы салаға қызығып жүрген зейнеткерге жабдықтарын сатуға келісім береді. Ә.Қаюпова «Даму» қоры арқылы 3 миллион теңге көлемінде жеңілдетілген несие алып, қондырғыларды сатып алады. Наубайхананы ауласындағы жапсарлас үйге орналастырып, бір жағын шағын дүкенге айналдырады.
Жалағаштағы бес мектеп пен үш балабақшаны және дүкендерді кондитерлік тағамдармен қамтамасыз етіп отырған кәсіпкер алғашқыда көптеген қиындыққа душар болып, түн баласы ұйықтай алмай қиналғандығын айтады.
Үйдегі хоббиі кәсіби кондитер болуға аздық етеді екен. Дайындаған өнімдері тұтынушы көңілінен шығуы үшін біліктілік керек. Бәсекеге қабілеттілік сын көтермеген жерде шығынға отырасың. Осының бәрінен өткен кәсіпкер облыс орталығындағы мамандар көмегіне жүгінген. Тынымсыз ізденіс, еңбекқорлық күткен межеге жеткізді.
Кәсіби біліктілігін жетілдіру үшін алды Қызылорда, соңы Шымкент арасында шапқылап, түрлі кондитерлерден дәріс алған кәсіпкер әлеуметтік желідегі рецептілерді де пайдаланып жүр. Жаңа өнім түрлерін өндіруге көп уақытын жұмсады.
Осылайша, алғашқы асуларды ала бастаған кәсіпкер облыстағы Кәсіпкерлік палатасына шетелден кондитер маманын шақыру ұсынысымен шығады.
Кәсіпкерлер палатасы Әйгерімнің сұранысын ескере келе, «Бизнестің жол картасы-2020» мемлекеттік бағдарламасы және «Аға сеньорлар» құрылымы аясында Түркиядан Маджит Горпюз есімді маманды алдырады. Түрік сарапшысының наубайхана саласындағы тәжірибесі 20 жылдан асады. Наубайхана және кондитерлік істе жан-жақтылығымен көзге түскен, аса білікті мамандар қатарындағы шетелдік маман өзінің тәжірибесімен бөлісті.
– Кәсіпкерлер палатасының шақыртуымен Түркиядан келген Маджит бізге үлкен қолдау көрсетті. Өнімдерді әзірлеудің оңтайлы жақтарын көрсетіп берді. Кремдерді жасау тәсілдерін, бисквитті сәтті шығаруды, торттың түрлерін жасауды үйретуде. Байқағаным, біз көп шығыс жасайды екенбіз. Маджит бізге бар шикізаттан қалдықсыз өнім шығаруды, тіпті үнемдеуге дейін үйретіп жатыр, – дейді кәсіпкер.
Ә.Қаюпова биыл кәсібін кеңейту үшін «Ауыл шаруашылығын қаржылай қолдау қоры» АҚ-ның Қызылорда облыстық филиалынан 4 млн теңге көлемінде несие алды. Бұл қаржыға талапқа сай наубайхана салып, бүгінде төрт адамды жұмыспен қамтып отыр.
Бақтияр ТАЙЖАН,
«Егемен Қазақстан»
Қызылорда облысы
