Өткен жылдың сәуірінде «Egemen Qazaqstan» газетінде ата кәсіпті жаңғыртып, жомарттығымен танылған Сырым Ертаевтың еңбегі мен үлгілі бастамалары жөнінде жазған едік. Елге жасап жүрген қайырымдылық істері жөнінде айтуды мүлде ұнатпайтын азаматтың мүмкіндігі шектеулі жандар мен аз қамтылған отбасыларға қолдау көрсетіп, қаржылай көмек беріп жүргенін, көпбалалы, жалғызілікті аналарға баспана салып беріп, бала тәрбиесімен алаңсыз айналысуына жағдай жасап жүргенін жазған едік сол жолы. Бұл істі кәсіпкер өз ауылында ғана емес, көрші елді мекендерде де жалғастырып жүргенін, жылына 3-4 тұрғын үй мұқтаж жандарға тегін берілетінін де айтқанбыз. Кәсіпкер бұл игі ісін тоқтатқан жоқ. Қазығұрттық екі отбасы бүгінде жаңа баспана үшін кәсіпкерге алғысын білдіруде.
Сондай-ақ, кәсіпкер көптеген тұрғындарды жұмыспен қамтып отыр. Осылайша, ол «Қазақстандағы 100 жаңа есім» қатарына шынайы ел патриоты ретінде енгенін ісімен дәлелдеп жүр. Кәсіпкердің қайырымдылық жолындағы үлгісін аудандағы жомарт жүректі жандар да қолдап, жалғастыруда. Соның бірі ретінде аудандық "Жалында жастар" қоғамдық бірлестігінің облыс және аудан кәсіпкерлерінің қолдауымен әлеуметтік жағдайы аз қамтамасыз етілген отбасыларға үй-жиһаздарын және азық-түлік алып бергенін айта кетелік.
Ғалымжан ЕЛШІБАЙ,
«Егемен Қазақстан»
Түркістан облысы
