Келісім екі мемлекеттің мұнай-газ, мұнай-газ-химиясы және электр энергетикасы саласындағы ынтымақтастығын ынталандыруды, Өзбекстан Республикасына шикі мұнайдың жеткізілуін ұлғайтуды, сондай-ақ, Қазақстанның оңтүстігін күзгі-қысқы кезеңде табиғи газбен үздіксіз жабдықтауды көздейді.
Бүгінгі отырыста мемлекеттік қызмет және сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы депутаттық заң жобасы бірінші оқылымда мақұлданды.
Заң жобасының негізгі нормалары конкурстық іріктеуден өткен және тиісті жергілікті атқарушы органдардың басшылары лауазымына тағайындалатын кандидатураларды орталық атқарушы органдармен міндетті келісу туралы нормаларды қолданыстағы бірқатар заңдардан алып тастауға, конкурстық комиссия мен бірыңғай конкурстық комиссия құру тәртібін нақтылау жолымен конкурстық рәсімдерді жетілдіруге, уәкілетті органның мемлекеттік қызметшілерді басқа мемлекеттік органдарға іссапарға жіберу тәртібін әзірлеу жөніндегі функцияларын бекітуге, мемлекеттік қызметті тоқтату және қайта бастау мерзімдерін нақтылауға, сынақ мерзімін есептеу мен өткізу тәртібін нақтылауға, міндетті арнайы тексеру жүргізу тәртібін нақтылауға, саяси мемлекеттік қызметшілерді, сондай-ақ «А» корпусының кадр резервіндегі адамдарды «А» және «Б» корпусының мемлекеттік әкімшілік лауазымдарына тағайындау тәртібін нақтылауға бағытталған.
Сонымен қатар, бүгінгі отырыста Палата Тәжікстан, Қырғыз, Қазақстан республикалары мен Исмаилиттер Имаматы арасындағы Орталық Азия Университетін құру жөніндегі шартқа хаттаманы ратификациялау туралы заң жобасымен бейінді комитетке жұмысты жалғастыру жөнінде тапсырды.
Сондай-ақ, Мәжілістің жалпы отырысында «Қорғаныс өнеркәсібі және мемлекеттік қорғаныстық тапсырыс туралы» заң жобасын Сенат енгізген өзгерістер мен толықтыруларды қарады.
