Салтанатты жиында сөз алған Maqsut Narikbayev University басқарма төрағасы Талғат Нәрікбаев: «Бүгін біз университетіміздің 30 жылдық мерейтойына орайластырған өте маңызды оқиғаға жиналдық. 30 жыл өте аз сияқты көрінгенімен, біздің қызметкерлер, оқытушылар және түлектеріміздің арқасында университетіміз елеулі нәтижеге жетіп, үлкен жолдан өттік. Өздеріңіз білетіндей, біздің басты миссиямыз – ел мүддесіне қызмет ету. Осы орайда аталған қағидатымызды орындау үшін қажырлы еңбек еткен әрбір Maqsut Narikbayev University мүшесіне шын жүректен алғысымды білдіремін», деді.
Кеш бағдарламасы аясында университет туының ашылу рәсімі өтті. Тудың ауданы 850 шаршы метрді құрады, аталған атрибут университеттің білім беру және қоғамдық кеңістіктегі күші мен маңыздылығын көрсетті. Осыған қоса мерейтой аясында университет мектептері арасында жарыс өткізілді. Бұл сайыста университеттегі төрт мектеп және әкімшілік-басқару персоналы «Университетті үздік құттықтау» атағы үшін өзара таласты. Аталған доданың жүлде қоры 5 млн теңгені құрады. Ұйымдастырушылардың айтуынша, қатысушылар бұл шараға үш ай бойы дайындалған. Университетті үздік құттықтау байқауында «Жоғары құқық» мектебі жеңіске жетті. Студенттер мен оқытушылардың бірлесе ұсынған шығармашылық өнерлері қазылар алқасының жоғары бағасына ие болды.
Оқырмандарға ақпарат ретінде қоса кетейік, Maqsut Narikbayev University тарихы 1994 жылы 14 наурыздан бастау алады. Ал университеттің баспасөз қызметі тартқан дерекке сүйенсек, осы уақыт ішінде университет өз миссиясына сай, яғни Қазақстан халқына қызмет етуді басты қағидаты санайтын 40 мыңға жуық білікті маманды дайындап шығарды. Maqsut Narikbayev University Қазақстанда білім берудің халықаралық деңгейін ұсына отырып, еліміздің университеттері арасында көш бастап тұр. 30 жыл ішінде университет бірнеше ірі жетістікке қол жеткізді. Атап айтқанда, ТМД-да бірінші болып QAA (The Quality Assurance Agency for Higher Education) аккредитациясына ие болды, ACCA, CFA, CIMA, TOLES сертификаттарын алды, сондай-ақ BIG4-те жұмыспен қамту бойынша үздік топ-5 университет құрамына енді. Онымен қоса, университеттің білім беру бағдарламаларының көпшілігі FIBAA халықаралық агенттігімен аккредиттелген.
