Суретті түсірген – Арман МУХОТОВ
Биыл байқаудың республикалық кезеңіне қатысуға мыңдаған үміткер өтініш қалдырып, «Асар», «Туған жер», «Батыл жүрек», «Мейірім жолында», «Қайырымдылық тарихы» сынды бес аталым бойынша өңір-өңірден келген 46 лауреат марапатталған. Ақпанда өткен осы байқауға елордадан 62 үміткер қатысыпты. Республикалық байқаудың ізімен қазір әр өңір өзінше қайырымды жандарға құрмет көрсетіп, алғыс айтуды бастап кетті. Мысалы, байқаудың Астана қаласындағы лауреаттарын марапаттау салтанатын өткізуге Қазақстан іскер әйелдер қауымдастығымен қатар қалалық әкімдік ынталы болыпты.
– Қоғамның тұтастығын, елдің амандығын ойлайтын ізгі ниетті жандар көп. Сол жақсы-жайсаңдарға алғысымыз шексіз. Қиын-қыстау күндерде сүрінгенге демеу болып, жетімін жылатпаған халықпыз. Сол қалпымыздан танбай, қысылтаяңда бірімізге-біріміз демеу болып келеміз. Тосыннан келген тасқынға өңірлерден мыңдаған ерікті, әскерилер тас-түйін жұмылып, тұрғындарға жәрдемдесіп жатыр. Гуманитарлық көмек жөнелтіп жатқандар қаншама? Мұның барлығы – қайырымды, мейірбан, жанашыр, отансүйгіш азаматтардың қолынан келетін іс. Иә, қайырымды жандар көбіне-көп байқауға өтінішті өздері қалдырмайды. Әріптестері, досжарандары бізге хабарлап жатады. Біз сол өтінішті қабылдап, шын жанашыр жандарды назардан тыс қалдырмауға тырысамыз. Өйткені мұның барлығы кейінгі толқын жас буынға үлгі-өнеге деп білеміз, – дейді Қазақстан іскер әйелдер қауымдастығының төрағасы Раушан Сәрсембаева.
Сонымен «Батыл жүрек» аталымында көппәтерлі тұрғын үйдің 20-қабатындағы қызды құтқарған Нарұл Төреқұл, қызыл жалын шарпыған үйден баланы аман алып қалған Есен Қарабеков марапатталды. «Асар» аталымында кәсіпкер, инноватор, шығармашылық студия-ателье жетекшісі Мадина Даниярова ынталандыру сыйлығын алды. Сол секілді басқа да аталымдар бойынша үміткерлерге сый-құрмет көрсетілді. Жанашыр жандарды генерал-лейтенант Бақытжан Ертаев құттықтап, алғыс айтты.
Көптің құрметіне бөленген азаматтардың қатарындағы Астана қаласы төтенше жағдайлар департаментінің Азаматтық қорғау капитаны Балнұр Шдерина су басқан өлкелерге көмекке аттанған әріптестерін мақтан тұтатынын айтты.
– Қазір төтенше жағдайларды жою басқармасында еңбек етемін. Салада жұмыс істеп жүргеніме 8 жылдан асыпты. Жыл сайын Республикалық оқу-жаттығу жиындарына қатысамыз. Шыңдаламыз. Бүгін департаментте еңбек етіп жүрген бірнеше әріптесіміз марапатталды. Бірақ олардың басым көпшілігі қазір су тасқынына байланысты Қостанай, Ақтөбе, Атырау облыстарында сапарда. Төтенше жағдай жарияланған аумақтарда жұмысын абыроймен атқарып жүр, – деп әріптестеріне табыс тіледі Б.Шдерина.
«Мейірім жолында» аталымында марапатталған спорт жанашыры Сәуле Тасболатқызы қор ашып, спорттан алыстаған оғландарға қолдан келген көмегін көрсетіп жүрген жайы бар. Иә, дүбірлі додаларда жасындай жарқырап, көптің алдында жүрген спортшылардың ішінде кәсіби мансабын аяқтаған соң, қоғам назарынан тыс қалып қоятындар кезігеді. Сәуле Тасболатқызы осындай спортшыларды қолдап, жігерлендіруге тырысып бағады. Ұйымдастырушылар «Мейірімділік керуені» байқауына қатысқан жанашыр жанның барлығы құрмет-қошеметке лайық екенін еске салып, алғыс айтты.
