Атырау облыстық төтенше жағдайлар департаменті қоғаммен байланыс тобының мәліметіне сүйенсек, су тасқынының қаупінен қорғау үшін Жылыой ауданының 36 738 тұрғыны эвакуацияланды. Оның ішінде 8 382 бала бар.
Құлсарыда су астында қалған тұрғын үй мен өзге де нысандардың саны 2 800-ден асты. Тұрғын үйлерге кірген су әлі тартыла қоймады. Мәселен, Жылыой ауданындағы №2 және №9 мемлекеттік өрт сөндіру бөлімінде жұмыс істейтін 8 қызметкердің үйі тасқын су астында қалған.
«Тұрғындарды құтқару жұмыстарын жүргіздім. Оқиға орнынан кетіп қалуға болмайды. Тіпті су басқан үйіме баруды ойламадым. Өйткені өзіме тапсырылған міндетті орындауым қажет болды. Әріптестерім менің ата-анамды, балаларымды су басқан үйден алып шығып, эвакуациялық пунктке жеткізді. Қазір отбасым Маңғыстау облысының Бейнеу ауданына уақытша тұрақтады», дейді өрт сөндіру көлігінің жүргізушісі Нұрболат Оразов.
Қазір Құлсары қаласында тасқын суды сору, бөгеттерді нығайту жалғасып жатыр. Бұл жұмысқа 5 658 адам, 187 техника, 17 жүзу құралы, 21 мотопомпа тартылған. Құлсары қаласынан 14 сәуірге дейін 250 мыңнан аса текше метр су сорылған.
Жылыой аудандық электр жүйесі торабының басшысы Марат Таңатарұлының айтуынша, 5 сәуірде Құлсары қаласындағы 10 шағын ауданда жарық өшірілген. Енді су баспаған 500 үйге электр жарығы қайта берілді. Жағдайды жедел қалыпқа келтіру мақсатында уақытша трансформаторлар орнатылды. Жарықты қалпына келтіру жұмыстарын үйлестіру үшін Құлсары қаласында 4 бригада іске кірісті. Бригадалар құрамындағы мамандар 8 арнайы техникамен тәулік бойы жұмыс істеп жүр.
Аудан әкімінің орынбасары Гүлнафис Айшуақованың айтуына қарағанда, сауда орындары қалыпты жұмысына кірісті. Оның ішінде 100 азық-түлік дүкені, 2 ірі супермаркет, 3 ірі көтерме сауда базары бар. Сондай-ақ 20-ға жуық дәріхана қайтадан ашылды.
«Қаладағы қоғамдық тамақтану орындары да жұмысын бастады. Тәулік бойы жұмыс істейтіндері бар. Сауда орындарының иелеріне түсіндіру жұмысы жүргізіліп, бағаны негізсіз қымбаттатпауды қадағалап отырмыз», дейді Г.Айшуақова.
Ал «Батыс Тех Инвест» ЖШС басшысы Әуез Әбіләкімнің мәліметіне сүйенсек, төтенше жағдай жарияланғанға дейін Құлсары қаласында 55 автобус 12 бағытта жолаушы тасымалдаған. Бірақ су тасқынынан автобустар тоқтап қалған. Қазір қалада 14 автобус 4 бағытта жолаушы тасымалдайды. Бұған қоса Қосшағыл, Жаңа Қаратон, Майкөмген, Жем ауылдық округтеріне қатынайтын автобустар рейске шықты.
«Қазавтожол» ұлттық компаниясы Атырау облыстық филиалының директоры Мұрат Мықтыбаевтың мәліметінше, 4 сәуірде Жем өзенінің суы «Доссор – Құлсары» тасжолының 101-шақырымын шайған. Содан бері бұл жолмен көлік қозғалысы тоқтатылды. Осының салдарынан 470 жүк көлігі Маңғыстау өңірі мен Өзбекстанға жете алмады. Жүк көліктері Доссор кентінің маңында бір аптадан аса тұрып қалды. Олардың арасында Түрікменстан мен Өзбекстанның, Украина мен Молдованың, Румынияның, еліміздің өзге өңірлерінде тұратын жүргізушілер бар. Аустрия елінің екі жүргізушісінің тұрғанына біраз болған. Мәселен, түрікменстандық Мехбан Амангелдиев Ресейден келе жатыр. Ол мұнда 5 сәуірден бері тұр. Ал Өзбекстан азаматы Шохир Раббиев Түркиядан жолға шыққан.
«Қазавтожол» компаниясы 13 сәуірде трассаның су шайған бөлігін қалпына келтіруге кірісті. Бүлінген жол учаскесін жөндеуге 45 адам, 28 техника жұмылдырылды. Жол бөлігіне су өткізуге арналған 12 құбыр салынды. Оның үстіне инертті материалдар төселді.
Облыстық полиция департаменті патрульдік полиция ротасының командирі Әділбек Шахметовтің айтуынша, жолдың жөнделген бөлігі үздіксіз бақылауға алынады. Өйткені жолдың бұл бөлігінде көліктердің бір бағытпен ғана қозғалуына рұқсат берілді. Сол себептен полиция қызметкерлері көліктердің кезекпен жүруін реттейді.
Биылғы су тасқынының зардабы аз болмайын деп тұр. Өкініштісі, адам шығыны да, мал шығыны да бар. Су астында қалған мүліктің есебін әзір ешкім білмейді. Төрт адам тасқын судың құрбаны болды. Әне-міне 50 жасқа толғалы жүрген жігіттің тракторы аударылды. Ол досымен бірге суға батты. Бұдан соң әкесі мен баласы тасқын судан шыға алмай қалды.
Ветеринарлық бақылау және қадағалау комитеті Жылыой аудандық аумақтық инспекциясының басшысы Жәнібек Сабыровтың айтуынша, су тасқынының салдарынан өлген мал, ит пен мысық өлексесі жиналып жатыр. Өлекселер әлі де табылуы мүмкін. Сол себептен өлекселерді жинау, жою жұмысы әлі де жалғасады.
«Жылыой аудандық ветеринария стансасы қызметкерлері Құлсары қаласында су тасқыны кезінде өлген төрт түлік пен құстардың өлексесін жинауды бастады. Қазір төлін қоса алғанда 60 қой-ешкі, 8 үй құсы, бір ит пен бір мысықтың өлексесі жиналды. Өлекселерді мал қорымдарында және арнайы белгіленген шұңқырларда өртеу жолымен жою жұмыстары жүргізіліп жатыр», деді Ж.Сабыров.
Атырау облысы
