1 тоннадан 20 тоннаға жеткізді
Мектеп бітірген соң сол кездегі Ленинград қаласындағы есеп-кредит техникумынан техник-электромеханик мамандығын алып шыққан Айтжан Сахиұлы еңбекке ерте араласты.
Ел экономикасы нарыққа бейімделіп, кәсіпкерлік қолға алына бастаған елең-алаң шақта алғашқылардың бірі болып жеке кәсіпке тәуекел етті. Бүгінде кәсібін өрге домалатып, ел экономикасына үлес қосып отыр.
Айтжан Сауғабаевтың нан цехын қолға алуына Ақтауда өткен халықаралық көрмеге қойылған германиялық нан пісіретін құрал-жабдықтарды көруі әсер етті.
Көрмеге келген аппараттарды сатып алып, бір ай бойы мамандарына неміс әріптестерінің тәлім-тәжірибесін үйретті. Көп ұзамай, 1994 жылы қараша айында «Мағаш» жауапкершілігі шектеулі серіктістігінің алғашқы нан өнімдерін сатылымға шығарды.
Біз жай ғана «батон» деп атайтын француз багетін пісіріп, қаладағы үлкен базарға орналастырған шағын вагонда нан саудасын жолға қойды. Сатып алушылар қаз-қатар кезекке тұрып кәсіпке жан бітірді, кеудеге үміт сыйлады. Нанның 3-4 түрінен тәулігіне 1 тонна нан пісіретін зауыт қуаттылығы уақыт өте келе 2 тоннаға артты. Алайда бұл жұмыс екпініне ресейлік пештер тек бір-екі жыл шыдап, тесіліп істен шықты. Мәскеу қаласында ұйымдастырылған ірі көрмеге барған Айтжан германиялық құрал-жабдықтарға қызығушылық танытты.
«Нанның негізі – ашытқы» дейтін немістер сұйық ашытқы дайындайтын құралдарын көрмеге шығарып тұр екен. Осы аппараттарды сатып алған «Мағаш нан» енді нан дайындау көлемін тәулігіне 10 тоннаға көтерді, артынша аталған елден су жаңа нан пісіретін пештерді сатып алып, нан пісіру көрсеткішін тәулігіне 20 тоннаға жеткізіп, жұмыс қарқынын арттырды.
Заманауи технологиялар – сапалы өнімнің кепілі
Бүгінде «MAGA-BREAD» ЖШС – Маңғыстаудың мақтанышы, шеттен келгендерге мерейлене көрсете алатын кәсіпорын. Ақтауға әр жылдары сапармен келген Мемлекет басшылары да «Мағаш нан» зауытының жұмысымен жақсы таныс. Арнайы келіп, аралап көріп, алғысын айтып, марапатын тапсырып жүргені зауыт дәлізінің қабырғасына ілінген суреттер мен мадақтама қағаздардан көрініп тұр. Ақтауда піскен нан түрлері алыс шетелдерде өткен түрлі көрмеде таныстырылып, лайықты бағасын алып жүр.
Қазір нан, печенье, кондитерлік өнімдердің 250-ге тарта түрін, 12 түрлі макарон өнімдерін өндіріп, тәулігіне 50 тонна нан, 20 тонна макарон өнімдерін ел игілігіне ұсынып отырған «MAGA-BREAD» ЖШС-нан зауыты 300-ге тарта адамды жұмыспен қамтып отыр. Зауыттың өнімдері Маңғыстау облысы көлеміне толық таралады. Сапасына сын айтылып көрген емес. Зауыт ХАССП жүйесіне енген, яғни технологиялық үдерістердің сапасы деңгейінде азық-түлік өнімдерінің қауіпсіздігі бақыланады.
«Заман талабына сай жабдықтарды жаңғыртып отыру, өнім алуантүрлілігін арттыру, өнімнің сапасы мен қауіпсіздігі – кәсіпорынның басты стратегиялық мақсаты және ұстанымы. Зауытта үнемі жоғары сапалы өнім дайындау үшін жоғары дәрежедегі тәжірибелі мамандар, өз ісінің шеберлері жұмыс істейді», дейді кәсіпкер А.Сауғабаев.
Нан дайындауда Diosna, MIWE, Hatton.Kunze, Capway сынды шетелдік танымал заманауи технологиялық құралдар қолданылады. Зауыт ауа температурасын жыл бойы қалыпты деңгейде қамтамасыз етіп тұратын «Airinotec» фирмасының жоғары сапалы желдеткіштерімен жабдықталған. «Eberhardt» фирмасының жабдықтарымен «Кайзер» бөлкесі, «Fortuna Fritsch» фирмасының құралымен «бретцель», «Tradirorm» фирмасы жабдықтарымен «Чиабатта» дайындалады. Нанды дайындау мен таратуға дейінгі үрдіс толықтай заманауи компьтерлік технологиямен автоматты түрде жүзеге асырылады. 2017 жылы қолданысқа берілген «Мағаш» макарон өнімдері зауытында өнімдер германиялық, италиялық заманауи құрал-жабдықтармен халықаралық стандартқа сай дайындалады. 100-ден астам атауға ие макарон өнімдерін өндіру және таратуға дайындау үшін шетелдік «Diosna», «Rondo Doge», «Kaleijer», «Daub Bakery Machine» фирмаларының құралдары пайдаланылады.
Әлеуметтік жауапкершілік ұмыт қалған емес
Кәсіпкер Айтжан Сахиұлы демеушілік, қайырымдылық жасаудан тыс қалған жоқ. Нарықтық экономиканың алғашқы жылдарындағы қиын кезеңде әр жұмысшыға бала санына қарай бірнеше дана нанды тегін таратса, бірнеше адамның үй, көлік алуына қолұшын берді. Отпан таудағы тарихи-мәдени кешен жұмысына 1 миллион теңге аударғаны да атап өтуге тұрарлық іс. 2023 жылы Ақтау қаласының 55 жылдығына орай өз қаржысына қаладағы Абай атындағы мәдени-демалыс кешенінің алдына Абай ақынның алып ескерткішін орнатты.
Кәсіпкердің орындасам деп құлшынып отырған арманы мен мақсаты аз емес. Дегенмен қазіргі биігінің өзі – мақтауға да, мақтануға да тұрарлық.
Маңғыстау облысы
