Суретші 1947-1991 жылдар аралығында 490 дүркін атом бомбасы (26 дүркін жер бетінде, 87 дүркін атмосферада, 354 дүркін жер астында) жарылып, сынақ жүргізілген Семей ядролық полигонына іргелес Егіндібұлақ ауылында туған.
«Бала кезімде жарылыстан үйдегі аспалы шамдар қозғалып, ыдыс-аяқ сылдырлайтын. Бәріміз далаға атып шығатынбыз. Бізге радио хабарлама арқылы «ешқандай радиацияның тарамағаны» туралы айтатын. Сөйтсек, олай болмапты, мен туған ауыл 40 жыл радиация уын жұтыпты. Көптеген отбасында мүгедек балалар дүниеге келді. Соның бір куәсі менмін. Сондықтан өмірімді осы мәселеге арнадым», дейді К.Күйіков.
Көрмеге суретшінің 20-ға тарта туындысы қойылды. Олардың арасында кенепке майлы бояумен салған: «Полигон құрбаны», «Ана қорқынышы», «Аман қалған», «Бұрышта», т.б. картиналарымен қатар акварель стилінде қағазға жазылған «Қазақ эпосы», «Қарттар» атты шығармалары бар. Туындылардағы басты тақырып – ядролық қарудың адам баласына тигізген зардабы. Сондықтан да болар 2016 жылы Вашингтон қаласында өткен Ядролық қауіпсіздік саммитінде Елбасы Нұрсұлтан Назарбаев сол кездегі АҚШ Президенті Барак Обамаға Күйіковтің «Жарылыс» атты картинасын табыстаған болатын.
Жиынды ашып, сөз сөйлеген Ұлттық музей басшысының міндетін атқарушы Жәкен Таймағамбетов мырза, бұл шараның осымен үшінші мәрте ұйымдастырылып отырғанын, бұл жолы 1945 жылы 6-9 тамызда Жапонияның Хиросима және Нагасаки қалаларына тасталған атом бомбасының зардабын еске алу мақсатында өтіп отырғанын жеткізді.
Көрменің өтуіне қолдау көрсетушілер атынан – Сыртқы істер министрінің орынбасары Роман Василенко мен Жапонияның еліміздегі Төтенше және өкілетті елшісі Итиро Кавабата жылы лебіздерін білдіріп, шығармашылық иесіне толайым табыстар тіледі.
