Сурет: Tengrinews.kz
Мұндай жағдайды «теміржолшыларды» өкшелеп келе жатқан «Қайрат» өз пайдасына шебер пайдалана білді. Өз алаңында Қарағандының «Шахтерін» қабылдаған жаңа бапкер Карлос Феррердің шәкірттері «кеншілерді» 3:1 есебімен тізе бүктірді. Жалпы, «Қайрат» биылғы чемпионатта «Шахтерге» қырғидай тиді. Осы кездесудің алдындағы ойындарда екі рет 4:1 есебімен күйрете жеңген болатын. Бәрін қосқанда алматылықтар Қарағанды клубының қақпасына 11 гол соғып, өзіне бар-жоғы үш доп қана жіберіп алған екен. Сөйтіп, «Қайрат» көш басындағы «Астанамен» арадағы ұпай алшақтығын аз күнге болса да төрт ұпайға қысқартты.
Қола жүлде үшін тартыстан мән кеткен сияқты. Неге десеңіз, Шымкенттің «Ордабасы» осы турда «Атырауды» өз алаңында 2:0 есебімен жеңді де, қыр соңынан қалмай келе жатқан «Ертістен» сегіз ұпайға ұзап кетті. Ал, павлодарлықтар болса, өз алаңында «Қайсармен» 0:0 есебімен тең түсіп, тағы да ұпай жоғалтты.
Турнир кестесінің төменгі жағындағы жағдай да осы турдан кейін бәлендей өзгеріске ұшырай қойған жоқ. Көш соңындағы «Ақтөбе» сырт алаңда «Ақжайықпен» тең түсіп, «аутсайдер» деген атқа әбден мойынсұнғандай. Бұл екі ұжымнан төменнен жоғары санағанда үшінші сатыда тұрған «Оқжетпестің» де озып кеткені шамалы. Аутсайдерлермен көршілес Көкше футболшыларының кейінге қалдырылған матчта «Астанамен» ойнайтынын есепке алсақ, жоғарыдағы сөзімізге команданың жанкүйерлері кейістік білдіре қоймас деген ойдамыз.
Сұрмергендер арасындағы тартыста соңғы турда тағы да гол соғып, көзге түскен Жерар Гоу алда келеді. «Қайраттың» «қара маржанының» еншісінде 17 доп бар. «Астананың» шабуылшысы Жуниор Кабананга 15 голмен екінші орында келеді. Ал, Патрик Твумаси («Астана») мен Таңат Нөсербаев («Ордабасы») қарсыластар қақпасын 9 реттен дәл көздепті.
Өткен 24-турда мынадай нәтижелер тіркелді:
«Ақжайық» – «Ақтөбе» – 2:2 (1:0), Джурович, 20 (1:0). Зенькович, 46 (1:1). Джурович, 57 (2:1). Зенькович, 82 – пенальтиден (2:2). «Тобыл» – «Тараз» – 1:1 (0:0, Квеквескири, 72 – пенальтиден (1:0). Мане, 77 (1:1). «Ордабасы» – «Атырау» – 2:0 (0:0), Тұңғышбаев, 69 (1:0). Нөсербаев, 87 (2:0). «Ертіс» – «Қайсар» – 0:0 (0:0). «Қайрат» – «Шахтер» – 3:1 (0:1), Станоевич, 43 (0:1). Исаэл, 52 (1:1). Гоу, 67 (2:1). Ахметов, 85 (3:1).
Келесі 25-тур 26 тамыз күні өтеді:
«Атырау» – «Қайрат», «Қайсар» – «Ордабасы», «Оқжетпес» – «Ақтөбе», «Тобыл» – «Ақжайық», «Тараз» – «Ертіс».