Осы орайда, жуырда ғана Тараз қаласындағы «Төрткүл» керуен сарайында Мойынқұм ауданы өнерпаздарының «Мойынқұмның даласы мен әуені» атты думанды-сазды концерті болып өтті.
Аталған шара Мойынқұм ән-би ансамблінің орындауында күй атасы – Құрманғазының «Балбырауын» туындысымен ашылды. Сондай-ақ, концерт барысында «Қарлығаш» би тобы және Жәмила Омарова, Ерлан Айтқабыл сынды талант иелері өз өнерімен көпшіліктің көңілінен шықты. Әуелете салған ән мен мың бұрала билеген би де қазақ өнерінің құдіретін елге тағы бір танытқандай еді.
Ал мойынқұмдықтардың өнерін тамашалауға келген көпшілік ашық аспан астындағы Жазылбек Қуанышбаев атындағы мұражай және аудандық орталықтандырылған кітапхана көрмесімен танысты. Бұл жерде де аты аңызға айналған атақты шопанның өткен өмір жолы мен еңбек жолы керемет үйлесім тауып, көпшілікке жақсы әсер сыйлады.
Аталған думанды кеш облыстық мәдениет, архивтер және құжаттама басқармасының ұйымдастыруымен ЭКСПО-2017 халықаралық көрмесі аясында өткізілді. Ел ішіндегі таланттарды елге таныту мақсатында қолға алынып келе жатқан мұндай думанды кештер қыркүйек айының ортасына дейін «Төрткүл» керуен сарайында жалғасын табатын болады.
Келесі аптада қала тұрғындары мен қонақтары Қордай ауданы өнерпаздарының концертін тамашаламақ.
Хамит ЕСАМАН,
«Егемен Қазақстан»
Жамбыл облысы