Естеріңізде болса, Қазақстан Қарулы Күштерінің құрамасы «АРМИ-2017» халықаралық ойындарында жалпы командалық үшінші орынды еншілеген болатын. Сарбаздардың әзірлігін тексерген сайысқа әлемнің 29 елінен 150 команда қатысты. Далалық, әуе және теңіз машығы секілді додалар қорытындысы бойынша, Ресей Федерациясының командасы бірінші орынды, Қытай елінен келген «жунголар» екінші орынды иеленді.
Қазақ әскерінің абыройын халықаралық бәсекеде 350-ден астам жауынгер қорғаған екен. Баспасөз конференциясына келген спикерлер «тоғызыншы аумақтың» қарулы күштері төрешілер алқасы тарапынан жоғары бағаға ие болғанын мәлімдеді.
Жарыс қорытындысы бойынша Қазақстан қарулы күштерінің қоржынында 3 алтын, 7 күміс және 5 қола медаль бар. Бәсекенің салтанатты жабылу рәсіміне қатысқан Қорғаныс министрі, генерал-полковник Сәкен Жасұзақов халықаралық ойындар достықтың, халықаралық ынтымақтастықтың, бейбітшілік пен ниеттестіктің жаңа нышанына айналып, айрықша мазмұны және ғаламат ауқымымен ерекшеленетініне тоқталған.
Спикерлердің сөзіне сүйенсек, «АРМИ-2017» сайысында қазақстандық танкішілер биатлон жарысында 1 сағат 45 минут 41 секунд нәтижесін көрсетіп, күміс жүлдені қанжығасына байлапты. Ал 97616 әскери бөлімінің батарея сержанты, аға сержант Орынбек Сәндібеков «Достастық жауынгері» байқауының бас номинациясы бойынша екі дүркін чемпионы атанды.
Әскери халықаралық ойындар алдағы уақытта да жалғасын табады. Спикерлердің айтуынша, Қазақстан айтулы бәсекенің бірнеше кезеңін өткізуге әзір.
Абай АСАНКЕЛДІҰЛЫ,
«Егемен Қазақстан»