Полиция қызметкерлері қырағылық танытып, Қамысты, Қарабалық, Науырзым аудандарында барлығы ұрланған 57 тонна астықты шаруашылықтарға қайтарды.
Науырзым ауданындағы бір шаруашылықта 27 жастағы механизатор мен 42 жастағы күзетші алдын ала келісіп, 35 тонна бидайды жымқырған. Оның құны 2 миллион теңгеден асады. Полицейлер жұмысының арқасында ұрланған бидай шаруашылық иесіне қайтарылды.
Қамысты ауданында рейд кезінде полицейлер тіркемесі бар «КамАЗ» машинасын тоқтатты. 34 жасар жүргізушінің 18 тонна астықты ұрлап бара жатқаны белгілі болды. Бидайдың құны 900 мың теңгеге бағаланды. Полицейлер бидайды шаруашылықтағы төрт механизатордың алдын ала келісіп ұрлағанын анықтады. Ұрланған астық иесіне қайтарылды, енді ҚР ҚК 2- бөлімі , 188-бабы бойынша тергеу жұмыстары жүріп жатыр. Мұндай ұрлық Қарабалық ауданында да орын алды. Аудандағы Белоглинов селосының 21 жасар тұрғыны комбаиннан бидайдың элиталық сортын ұрлаған. Бидайдың бұл сортының тоннасы 90 мың теңге тұрады. Ұры 4 тонна бидайды жымқырған. Ұрлықты полицейлер түскен арыз бойынша ашты. Қазір алдын ала тергеу амалдары жүріп жатыр.
Нәзира ЖӘРЕМБЕТ,
«Егемен Қазқстан»
ҚОСТАНАЙ
