Әйелдер кәсіпкерлігінің дамуы еліміздің жалпы іскерлік ахуалымен тығыз байланысты. Бұл еліміздегі шағын және орта кәсіпкерліктегі әйелдер үлесінің артуымен дәлелденген. Бүгінгі таңда елде орта есеппен шағын және орта кәсіпкерлік субъектілерінің 42 пайызы барлық жұмыс орындарының 30 пайыздан астамын қамтамасыз ететін әйелдердің еншісінде. Ал әйелдердің елдегі ІЖӨ-ге қосқан үлесі шамамен 40 пайызды құрайды. Енді жастар кәсіпкерлігін дамытуға екпін түсіп отыр.
Қыздар мен жас әйелдер өздерінің мүмкіндіктерін кәсіпкерлікте ынталана іске асырады. Алайда, оларға нақты қолдау мен көмек керек. Осыған байланысты Қазақстанның іскер әйелдер қауымдастығы бүкіл ел бойынша «Жас қанаттар» атты бөлім құрды. Оған 18-ден 35 жасқа дейінгі, жаңадан 6 айдан 2 жыл аралығында кәсіпкерлікпен айналысқан жас қыздар мен әйелдер кірді. Бүгінде «Жас қанаттар» құрамына 200-ден астам кәсіпкер қосылған.
Қазақстан іскер әйелдер қауымдастығы өз қанатының астына еліміздегі ең мықты, ең үздік, ең әдемі қыздарды жинап отыр. Жұдырықтай жұмылсақ, қашанда оңай, қауіпсіз әрі сенімді. Біз ерекше кезеңде, еркін елде өмір сүріп жатырмыз. Біз – жоғары білімді қазақстандық қоғамның бір бөлігіміз. Әрқайсымыз саясатта, бизнесте, ғылымда биік жетістікке жете аламыз, деді сенатор. Осы орайда ол бүгінде нәзік жандылар ерлерден еш қалыспай, өз істерін жауапкершілікпен өте жақсы атқарып жүргенін сөз етті.
Қауымдастықтың «Жас қанатын» ашу – дер кезінде қолға алынған шара. Шын мәнінде, бүгінде жастардан үйренеріміз көп. «Жас қанаттар» ересектерге соңғы үлгідегі цифрлы технологияларда білімдерін үйретіп, делдалдар мен қажетсіз шығындарды айналып өту арқылы бизнес жүргізуге көмектеседі деп үміттенемін. Мүлдем басқа ортада өскен кәсіпкерлердің жас буыны жетіліп келе жатыр. Бұл балалар интернет және цифрлы технологиялар дәуірінде тәлім алған және бизнес жүргізуде олардың көзқарасы өзгеше. Бүгінде әлеуметтік желілер де бизнес жүргізуге жақсы жағдай жасады. Бұрын мұндай мүмкіндік болмаған, деді Д.Назарбаева.
Сенатор сондай-ақ, студенттерге арналған үздік бизнес жобаларға байқаулар өткізу керектігін атап өтті. Осы мақсатта жоғары сынып оқушылары мен колледж студенттері үшін кәсіпкерлік негізі бойынша оқу бағдарламаларын енгізу керек. Мектеп пен студенттік командалар арасындағы жеңімпаздарды анықтап, үздік бизнес жобаларды іске асыру үшін гранттар бөлген дұрыс.
Динара БІТІК,
«Егемен Қазақстан»