Парламент сессиясының ашылуында Елбасы белгілеген заңнамалық басымдықтарды басшылыққа алып, бірқатар мәселелер талқыланды.
Палатаның алдағы уақытта өтетін отырысында Мәжіліске келіп түскен жаңа заң жобаларының қорытындыларын дайындау мерзімін анықтау ұсынылды.
Бұлар «2018-2020 жылдарға арналған республикалық бюджет туралы» және «Қазақстан Республикасының Ұлттық қорынан 2018-2020 жылдарға арналған кепілдендірілген трансферт туралы» қаржылық заңдар жобасы. Осы қатарда «Қазақстан Республикасындағы кедендік реттеу туралы» Кодексінің жобасы және ілеспе түзетулер бар.
Сондай-ақ, тұрғын үй қатынастары мәселелері бойынша жаңа заң жобасы, әкімшілік құқықбұзушылық, есірткі, психотроптық заттар, сол тектестер мен прекурсорлар айналымын бақылау туралы түзетулер және әкімшілік құқық бұзушылық туралы Кодексіне түзетулер, енгізу көзделіп отыр.
Құжаттардың ішінде ратификацияланатын актілер де бар. Олар Еуразиялық экономикалық одақтың Кеден кодексі туралы Шарты мен 1996 жылғы 9 желтоқсандағы Нью-Делиде жасалған Қосарланған салық салуды болдырмау туралы Конвенция мен Хаттама.
Мәжіліске түскен ратификацияланатын пакеттер мен түзетуге енгізілетін 2006 жылғы 20 наурыздағы Қазақстан мен Өзбекстан арасындағы Халықаралық автомобиль қатынасы туралы Келісім мен осы сынды Қазақстан мен Норвегия арасындағы Халықаралық автомобиль тасымалдары туралы Келісімді атап көрсетуге болады.
Кеше Бюро отырысында «Мемлекеттік тілдің латын графикасындағы әліпбиінің бірыңғай стандартын енгізу мәселелері туралы» парламенттік тыңдау өткізу жөнінде шешім қабылданды.
Бұдан басқа, Палатаның пленарлық отырысындағы күн тәртібіндегі жобасына Парламент Мәжілісінің өкілеттіктерін іске асырудың үшінші сессияға арналған негізгі іс-шаралар Жоспары туралы мәселелеріне қатысты ұсыныс берілді.