Еліміздің Инвестициялар және даму министрлігі, «Атамекен» Ұлттық кәсіпкерлер палатасы, сонымен қатар Ұлттық палатаның еншілес ұйымы Қазақстанның Сыртқы сауда палатасы мұрындық болған ауқымды шараға екі мемлекеттің ірі компанияларының басшылары, бизнестің 450-ге тарта өкілі қатысқанын атап өткен жөн.
Халықаралық бизнес-форумда сөз сөйлеген Қазақстан Президенті екі мемлекеттің сауда-экономика саласындағы ынтымақтастығын дамытудың маңыздылығын айтып, бұл қарым-қатынасты кеңейтуге әлеуетіміздің жеткілікті екенін атап өтті. Елбасы Қазақстанда Польша кәсіпкерлеріне жұмыс істеуге барынша қолайлы жағдай жасалып отырғанына да тоқталды.
– Польша азаматтары Қазақстанда визалық талаптардан босатылған. Шағын және орта бизнесті, машина жасау және ауыл шаруашылығын дамыту жөнінде жұмыс топтары құрылды. Елдеріміз арасында жұмыс істеп жатқан үкіметаралық комиссияның рөлі маңызды. Өздеріңіз білетіндей, Қазақстан Еуразияның жүрегінде орналасқан, Ұлы Жібек жолының маңызды бөлігі болып табылады. Сол себепті Қытай Халық Республикасының идеясын («Бір белдеу – бір жол» – авт.) қолдадық. Оған қосылып қана қоймай, Ұлы Жібек жолын кеңінен дамытуға атсалыстық. Қытай шекарасынан Каспий теңізіне дейін автобан салдық. Ресей арқылы Еуропаға шығатын темір жол желісі тағы бар. Бұдан бөлек, оңтүстікке қарай баратын темір жол төселді. Аталған бағыттарды қытайлық әріптестеріміз де емін-еркін пайдалана алады. Ал Польша болса Еуропаның кіндігінде орналасқан. Яғни, біздің географиялық орналасу жағдайымыз бірдей. Демек, біз өзара ынтымақтастықты дамыта түсуіміз керек, – деді Елбасы.
Мемлекет басшысы Польшамен арадағы ынтымақтастықтың жарқын мысалы ретінде «Польфарма», «Селена Групп», «Пронар» сынды компаниялардың Қазақстанда табысты жұмыс істеп жатқанын айтты.
– «Польфарма» фармацевтикалық компаниясы табысты әріптестіктің жарқын мысалы саналады. Бүгінде Қазақстан 1 млрд долларға жуық дәрілік заттарды импорттайды. Сол себепті өз жерімізде зауыт пен фабрикалар салу аса қажет. Ол үшін біз барлық жағдайларды жасауға дайынбыз. «Астана» еркін экономикалық аймағының аумағында «Селена Групп» компаниясы құрылыс материалдарын шығаратын жобаны жүзеге асырды. Қала қарқынды дамуда, 1998 жылы еліміздің астанасы деп жариялағанда бұл жерде 150 мыңға тарта халық тұрса, қазір миллионнан асады. Қала құрылысы жалғасуда. ЭКСПО-2017 іс жүзінде қаланың жаңа бөлігін салды. «Қазтехмаш» зауыты польшалық компанияның технологиясын Петропавлда ауылшаруашылық техникаларын өндіретін зауытты іске қосты. Жалпы алғанда елімізде польшалық компаниялар қатысатын 15 кәсіпорын жұмыс істейді. Біз экономикалық қатынастарды одан әрі дамытуға ниеттіміз. Бүгінде Қазақстан бизнесті тиімді жүргізу үшін жаңа мүмкіндіктер мен зор әлеует қалыптастырып отыр. Бизнесмендердің осында өздерін еркін сезінуіне, жұмыс істеуіне барлық жағдайды жасадық,– деді Мемлекет басшысы.
Нұрсұлтан Назарбаев экономикалық қарым-қатынасты одан әрі дамытуға мүдделілік танытып, Қазақстанда алдағы кезеңде бизнес жүргізуге себеп болатын бірқатар мәселелерді атап өтті.
– Президент жанында Шетел инвесторларының кеңесі жұмыс істейді. 61 елдің азаматтары үшін визасыз режім енгізілген. 10 арнайы экономикалық аймақ пен 20-ға жуық индустриялық аймақ жұмыс істеуде. Мемлекет осы аймақтардың жұмысына қатысушыларды қажетті инфрақұрылыммен қамтамасыз етіп отыр. Оларға салық жеңілдіктері мен артықшылықтар берілген. Бұдан бөлек, жер қойнауын пайдалануға лицензия алу және шартқа отыру тәртібі жеңілдетілді, – деді Қазақстан Президенті.
Сондай-ақ, Мемлекет басшысы поляк бизнесмендерін еліміздегі кәсіпорындардың активтерін жекешелендіруге қатыстыру арқылы ынтымақтастықты нығайту және аграрлық секторда қарым-қатынас орнату мүмкіндіктеріне тоқталды.
– Біз Польшаның аграрлық сектордағы тәжірибесін жақсы білеміз. Польша сапалы ауылшаруашылық өнімдерінің ірі экспорттаушысы саналады. Қазақстан да осы салаға басымдық береді. Жыл сайын жылына 10 миллион тоннаға дейін жоғары сапалы бидай экспорттаймыз. Ет шаруашылығын дамытудамыз. Осының барлығы өңдеуді, өнім құнын арттыруды қажет етеді. Сол үшін сіздердің компанияларыңызды бірлесіп жұмыс істеуге шақырамыз, – деді Мемлекет басшысы.
Нұрсұлтан Назарбаев Қазақстанның жеделдетілген жаңғыру үдерісі экономикалық байланыстарды кеңейтудің қосымша мүмкіндігі болып саналатынын айтты.
– Біз іскерлік туризмнен экологиялық және рухани туризмге дейінгі туризмнің барлық түрін дамытуға зор мән береміз. Тікелей әуе қатынасының орнағанын ескеріп, өзара ынтымақтасуға және туристік өнімдерді ілгерілетуге мүдделіміз. ЭКСПО көрмесі аяқталған соң оның базасында «Астана» халықаралық қаржы орталығы жұмысын бастайды. Сондай-ақ, ЭКСПО базасында Жасыл технологиялар мен инвестицияларды дамыту жөніндегі халықаралық орталық жұмыс істейтін болады, – деді Нұрсұлтан Назарбаев.
Сөз соңында Қазақстан Президенті бизнесті дамыту және өзара тиімді серіктестікті нығайту үшін екі елдің бизнесмендерін барлық мүмкіндікті пайдалануға шақырды.
Қазақстан Президенті Нұрсұлтан Назарбаев 2016 жылы Польшаға мемлекеттік сапармен барған болатын. Польша Президенті Анджей Дуда бизнес-форумда атап өткендей, осы сапардан кейін ел арасындағы сауда-экономикалық қарым-қатынас жаңа деңгейге көтерілген.
– 2014 жылы Қазақстан мен Польшаның тауар айналымы 2 млрд доллардан асқан еді. Кейін бұл көрсеткіш аздап төмендеді, оған жаһандық экономикадағы мәселелер себеп болды. Дегенмен, бірлескен жұмыстардың арқасында біз бұрынғы деңгейге қайта көтеріліп келеміз. Биылғы жылдың алты айында Польшаның Қазақстанға шығарған экспортының көлемі алдыңғы жылмен салыстырғанда 50 пайызға артса, Қазақстаннан Польшаға тасымалданатын тауарлар көлемі 80 пайызға өсті. Сондықтан үлкен ілгерілеу бар деуге әбден болады. Алдағы алты жылда екіжақты тауар айналымын 6 млрд долларға апаруға әлеуетіміз жеткілікті деп санаймын,– деді Анджей Дуда.
Польша Республикасы елордада өтіп жатқан ЭКСПО-2017 көрмесіне белсенді түрде қатысушы мемлекеттердің бірі екендігі мәлім. Осы орайда, өзі де ЭКСПО-2022 халықаралық көрмесін өткізуге ниетті болып отырған Польша тарапы Қазақстанның қолдауына үмітті. Бұл туралы Анджей Дуда:
– Польша 2022 жылғы ЭКСПО-ны өткізуге тырысып жатыр. Аталған xалықаралық шараны біз Лодзь қаласында ұйымдастыруды жоспарлап отырмыз. Шаһардың атынан өтінім бермес бұрын тыңғылықты дайындық жұмыстары атқарылды. Бұл жолғы ЭКСПО-да Сіз бізді қарсы алсаңыз, 2022 жылы біз Сізді қарсы аламыз деген сенімдемін. Әрине, Қазақстанның біздің өтінімді қолдайтынына да үлкен сенім артып отырмыз, – деді.
Оның айтуынша, Польша өз жеріндегі ЭКСПО халықаралық көрмесінің тақырыбы ретінде постиндустриялық қалаларды дамыту мәселесін таңдаған.
– Лодзь ХIX ғасырда құрылған өндірістік қала. Шаһарда ескі ғимараттар мен тұрғын үйлер көп. Дегенмен, осының бәрін тариxи нысан ретінде шебер көрсете білсек, кез келген қалаға туристерді көптеп тартуға болады. Лодзь соның бір мысалы болса керек,– дейді ол.
Бизнес-форумда екі мемлекеттің ірі кәсіпорындар басшылары кәсіпорындардың тиімді жұмыстары, болашақ жоспары туралы баяндады. Польша тарапынан Энергетика министрінің орынбасары Гжегож Тобишовски, Аграрлық нарық агенттігінің төрағасы Лукаш Хоубовский, Кәсіпкерлікті дамыту жөніндегі агенттігінің төрағасы Патриция Кларецка, ал Қазақстан тарапынан Инвестициялар және даму министрінің орынбасары Ерлан Хайыров, Ауыл шаруашылығы министрінің орынбасары Рүстем Құрманов форумға модератор болды.
Жалпы, Инвестициялар және даму министрлігінің мәліметіне сүйенсек, соңғы 10 жыл ішінде Қазақстан экономикасына Польша тарапынан 200 миллион доллардан астам инвестиция салыныпты. Өткен жылдың қорытындысы бойынша, екіжақты тауар айналымының көлемі 783 миллион долларды құраса, биылғы жылдың соңына дейін бұл көрсеткіш өсе түспек.
Қазақстан Польшамен арадағы ынтымақтастық барысында өзара сауда-инвестициялық ынтымақтастықты дамыту, бірлескен кәсіпорындар қатарын көбейту, көлік-логистикалық ынтымақтастықты дамыту сынды бағыттарға басымдық береді. Елордада өткен бизнес-форумда Казақстан мен Польша компаниялары арасында ынтымақтастықты дамыту жөніндегі 10 меморандумға қол қойылды.
Суреттер Президенттің баспасөз қызметінен алынды