Әлем халықтарының 40 %-нан астамы латын негізді жазу түрін пайдаланады. Елбасы Н.Ә.Назарбаев халыққа Жолдауында «Қазақ алфавитін 2025 жылдан бастап латын графикасына көшіру үшін дайындықты осы бастан қолға алу қажет. Бұл қазақ тілін жаңғыртып қана қоймай, оны осы заманғы ақпарат тіліне айналдырады» деген болатын. Анығында, осы әліпбиді тұтынушы елдердің әлемдік өркениет пен мәдениеттегі, ғылым мен техника, медицина, т.б. салалардағы жетістіктері мен өнімдері де жоғары нәтижеде екендігін көріп отырмыз. Демек, еліміздің әлем елдерімен бәсекеге түсуіне латын әліпбиіне негізделген қазақ жазуы керек. Қазақ ұлтына қажетті нәрсе жалпы зияткерлік пен әлемдік деңгейдегі білім. Ал бұларға бастар қадам жақын уақытта латын әліпбиіне көшу деп есептейміз. Ұялы байланыстағы хабарламалар мен интернет жүйесі бойынша хабарламалардың көпшілігі осы графикамен жазылуда, сондықтан латын әліпбиін меңгеру қиынға түспейтіні анық.
Латын графикасына негізделген әліпби жүйесінің тиімділігін тілші ғалымдардың көпшілігі қолдап отыр.
Сонымен, латын әліпбиіне көшу – тіліміздің табиғи қалпын сақтауы үшін, қазақ тілінде компьютерлік жаңа технологиялар арқылы халықаралық ақпарат кеңістігіне енуіне жол ашылып, еліміздің жаңа заман талабына сай өсіп-өркендеуі және шетелдегі қазақтармен рухани, мәдени, ғылыми, экономикалық қарым-қатынасты нығайту үшін де тиімді болмақ.
Гүлназ КӘРІПЖАНОВА,
С.Торайғыров атындағы Павлодар мемлекеттік университетінің профессоры, филология ғылымдарының кандидаты
