Қазіргі озық технологиялар заманында латын әліпбиі қазақстандықтардың рухани жаңғыруы мен жас буынның жаңа сатыға көтерілуіне жол ашады. Сонымен қатар қазіргі қазақ тіліндегі жат дыбыстар тудыратын әріптер қысқартылып, тіл тазалығы мәселесі шешіледі. Латын әліпбиіне көшу – тілімізді халықаралық дәрежеге көтерудің бірден-бір жолы. Президент өз Жолдауында Қазақ елінің саяси-экономикалық, әлеуметтік-мәдени, ғылыми-ағартушылық дамуын, халықаралық кеңістіктегі орнын жан-жақты бағамдап, ішкі және сыртқы жағдайды толық ескеріп, әліпбиді қашан, қандай жолдармен ауыстыру керектігіне байланысты шешім шығарды. Арнайы бағдарлама бекітіліп, қаржылық қолдаулар да көрсетіліп жатыр. Осының барлығы Қазақстанның болашағы үшін атқарылып жатқан үлкен шаралар болып табылады.
Осы ретте «Жұмыла көтерген жүк жеңіл» демекші, әр қазақстандық өз тарапынан латын әліпбиіне көшу бағытына қолдау көрсетсе, еліміздің әлемдегі озық отыз мемлекет қатарына қосылу күні алыс болмайды. Президент Н.Ә.Назарбаев «Қазақстан-2050» Стратегиясында Қазақстандағы қазақтар ғана емес, тұтас халықтың 95 пайызы 2025 жылы мемлекеттік тілді игереді деп болжады. Яғни осы мерзім аралығында тұтас халық болып, латын әліпбиінің ел санасына сіңісуіне жол ашылған. Бұл да Елбасымыздың аса көреген саясатының бірі деуге болады.
Осы орайда Қазақстан Республикасы кәсіподақтар Федерациясы Елбасымыздың аталмыш бастамасын толыққанды қолдай отырып, еліміздің рухани жаңғыруы және дамуы жолында еңбек етуге дайын. Себебі кәсіподақтар ұжымы сананы жаңғырту мәселесіне өте көп көңіл бөледі. Әсіресе жастар арасында ғылым мен білім бәсекелестігіне жол аша отырып, кәсіби деңгейде дамуына баса назар бөлінген. Яғни Кәсіподақтар федерациясы әр кәсіподақ мүшесінің латын әліпбиіне көшу бағдарламасына қатысты толыққанды ақпараттандырылуы аясында жұмыстар жүргізеді.
Қазақстан Республикасы
Кәсіподақтар федерациясы
