Бұл шынында да «ғасыр жобасына» тұрарлық үлкен шаруа болды. Осы жобаның арқасында бұрын мүлдем газдандырылмаған Оңтүстік Қазақстан облысының 8 ауданындағы 284 елді мекеннің 700 мыңға жуық халқы көгілдір отынмен қамтамасыз етіледі деп жоспарланған. Ол туралы ресми ақпараттарда да, бұқаралық ақпарат құралдарында да талай рет айтылып, жазылып, бөркімізді аспанға ата қуанып, тұрғындар өз ризашылықтарын білдірді.
Бірақ 2013 жылдан бері 7 автоматты газ тарату стансалары салынғанымен, бүгінгі таңда жоспарланған тұрғындардың тек 4%-ы, яғни 52 мың халық қана көгілдір отынмен қамтамасыз етілді. Яғни төрт жыл өтсе де тарихи жобаның тікелей ауыл тұрғындарын көгілдір отынмен қамтамасыз ету мақсаты орындалмай отыр.
Жергілікті атқарушы органдар арқылы 121 елді мекенді газдандырудың жобалық-сметалық құжаттары дайындалып, 20 жоба құжаттарына мемлекеттік сараптамадан оң қорытындылар алынған. Барлық жобалық-сметалық құжаттарды әзірлеуге және 5 автоматты газ тарату стансалары құрылысына облыстық бюджет есебінен 16 млрд теңгеден астам қаржы жұмсалған. Осы құжаттар негізінде 23 елді мекендегі 121 мыңнан астам халықты көгілдір отынмен қамтамасыз ету үшін 10,9 млрд теңге қажеттілігі туындап отыр.
Өкінішке қарай Энергетика министрлігі тарапынан облыс әкімдігі ұсынған бюджет өтінімі қолдау таппай, 2018-2021 жылдарға арналған республикалық бюджетке кірмей қалған. Бұл – аталған жобаның алдағы үш жылда да тұрғындарды табиғи газбен қамтамасыз етуге арналған негізгі мақсатының орындалмай қалу қаупін тудырып, жобалық-сметалық құжаттардың жасалуына кеткен қыруар қаржының негізсіз шығын болуына әкеп соғуы мүмкін.
Оңтүстік Қазақстан облысы тұрғындарының өтінішін ескере отырып, осы мәселеге Премьер-Министр Бақытжан Сағынтаевтың назарын аудартып, ауыл отбасыларын табиғи газбен қамтамасыз ету мақсатында аталған қаржы көлемін алдағы үш жылдың бюджетіне енгізуге ықпал етуін сұрап, депутаттық сауал жолдадық.
Әли БЕКТАЕВ,
сенатор
