Тәуелсіз Мемлекеттер Достастығына қатысушы елдердің Парламентаралық Ассамблеясының (ТМД ПАА) құрылғанына биыл 25 жыл толды. Оның жұмысына Парламент депутаттары ғана емес, түрлі атқарушы органдардың мамандары, ғалымдар мен кәсіби заңгерлер қатысады. ТМД ПАА-ның маңызды міндеттерінің бірі – қатысушы мемлекеттер заңнамаларының бір-біріне үйлесімді үлгілерін әзірлеу.
Осы міндеттерге сәйкес заңнамалық актілер Достастық елдерінің және көбінесе еуропалық пен әлемдік халықаралық құқықтық стандарттарға сәйкес жасалуда. ТМД ПАА құрылғаннан бері 300-ден артық үлгілік заңнамалар мен 100-ден артық ұсыныстар қабылданды. Олардың бәрі де ұлттық заңнаманың дамуы мен тиімділігін арттыруға айтарлықтай үлес қосты. Ал Достастық елдері депутаттарының бірлескен жұмыстары парламентаралық ынтымақтастықты дамытуда маңызды рөл атқарады.
Мемлекет басшысы ұлттық заңнамаларды халықаралық стандарттар деңгейіне жеткізу мәселесін бірнеше рет көтерді. Қазақстан Республикасының Президенті бекіткен 2010-2020 жылдарға арналған құқылық тұжырымдамада: «ұлттық құқықтарды заманның жаңа талаптарына сәйкес және бәсекелестікке қабілетті қылу мақсатын қамтамасыз ету үшін мемлекеттің нормалық және құқық қолдану істерін одан әрі жетілдіру керек», деп жазылған. Осы талаптың шеңберінде, біздің ойымызша, ТМД ПАА әзірлейтін қоғамдық қатынастардың барлық салаларына қатысы бар үлгілік заңнамалық актілер де өзінің маңызды рөлі бар.
Осыған байланысты, Қазақстан Республикасының Үкіметі көптеген заң жобаларының бастамашысы болып отырғандықтан, еліміздің заңнамалық актілерін әзірлегенде ТМД ПАА ұсынған үлгілік заңнамалық актілер мен ұсыныстарды ескеруі қажет деп санаймын. Ол үшін Қазақстан Республикасының «Құқықтық актілер туралы» заңына әзірлеуші орган үлгілік заңнамалар мен ұсыныстарды ескеруі қажет деген толықтыруды жаңа заң жобасымен енгізу мүмкіндігін қарастыру қажет деп білемін. Мен осы ұсыныстарды Премьер-Министр Б.Сағынтаевтың атына жолдап, бастаманы аяқсыз қалдырмауды өтіндім.
Владимир ВОЛКОВ,
Сенат депутаты