Әлем • 27 Қараша, 2017

АҚШ пен Солтүстік Кореянының кезекті саяси арбасуы

360 рет
көрсетілді
2 мин
оқу үшін

 

Таяуда АҚШ билігі Солтүстік Кореяны терроризмді қолдайтын мемлекеттер тізіміне енгізген болатын. Өз кезегінде Пхеньян Ақ үйдің бұл әрекетін аран­датушылыққа балап, елдегі ядролық қару бағдарламасын одан әрі күшейтетінін жеткізген.  

АҚШ пен Солтүстік Кореянының кезекті саяси арбасуы

Korean Central News агенттігіне берген сұхбатында Солтүстік Корея сыртқы істер министрлігінің өкілі «Біздің ұлы елімізді «терроризм» тізіміне енгізуге дәті барған оңбаған бұзақыларға әскеріміз бен халқымыздың ашуы өршіп тұр», деп мәлімдеді. Al Jazeera арнасының хабарлауынша, кейбір сарапшылар Ақ үй билігінің әрекеті Солтүстік Кореяның шымбайына батып, ядролық қаруды игеруге құлшынысын одан әрі күшейтіп жіберетінінен қауіптенеді.

«Сыртқы істер министрінің өкілі терроризмді қолдап отырған мемлекет деп айыптау америкалық авторитарлық жүйенің құралы екенін және олардың өз көзқарасына сай келмейтіндерді сырып тастауға талпыну екенін айтты. Бұған дейін АҚШ президенті Дональд Трамп Солтүстік Кореяны ядролық қару арқылы әлемге қауіп төндіруден бөлек, халықаралық терроризмді қолдап отырғанын мәлімдеген»,  дейді Al Jazeera арнасы.

Жалпы, АҚШ пен Солтүстік Кореяның араздығы бүгін бас­талған жоқ. Бұған дейін КХДР бірнеше мәрте ядролық қаруын сынақтан өткізіп, құрлықаралық баллистикалық зымырандарын ұшырған-ды. Ақ үй басшысы Д.Трамп Солтүстік Кореяның бұл әрекетін айыптап, қарулы қар­сылық көрсетуге әзір екенін жет­кізді. Өз кезегінде Ким Чен Ын да кез келген уақытта Американың күлін көкке ұшыруға дайын екенін мәлімдеді. Екі басшының сөз қақ­тығысы біраз жерге барып басылған-ды.

Солтүстік Корея сыртқа жүнін қампайтып көрсетуге тал­пын­­ғанымен, елдегі жағдай мәз емес. Таяуда КХДР әскерінен қаш­­қан сарбаздың видеосы жер жаһан­ды шарлап кеткен болатын. Өз елінен бас сауғалаған сол­түс­тік­кореялық азамат Оңтүстік Корея­мен арадағы шекараға өлер­мен­дікпен ұмтылған-ды. КХДР шекарашылары заң бұзушыны қуалап, бірнеше жерден жаралады. Алайда оқ тигеніне қарамастан, ол көрші елдің аймағына өтіп үлгерген. Мұндай оқиға куә болған Оңтүстік Кореяның шекарашылары бейбаққа көмек қолын созыпты. Сарбаздың денсаулығын бақылаған дәрігерлер оның денесінен 27 сантиметрлік ішек құртын тауып алды. Қазір қашқынның жағдайы тәуір. BBC арнасының хабарлауынша, ересек адамның денесінде ұзын ішек құрттың болуы елдегі жағдайдың нашарлығын көрсетеді.

Шолуды әзірлеген 
Абай АСАНКЕЛДІҰЛЫ,
«Егемен Қазақстан»