Тоқсан бес пәтерлі, бес қабатты жаңа үй Күленов ықшамауданында бой көтерген «Ривьера Резиденс» тұрғын үй кешенінде орналасқан. Ерекше сәулетімен көз тартатын зәулім ғимарат алаңында бірнеше спорт және ойын алаңдары, автотұрақ, сенімді қауіпсіздік жүйесі, дәріханалар мен наубайхана, супермаркет, банк бөлімшелері ашылып, кешен тұрғындары үшін барынша қолайлы жағдай жасалған. Бүгінде аумағы 46 шаршы метрден 242 шаршы метрге дейін болатын бір, екі, үш, төрт бөлмелі пәтерлер сатыла бастапты.
«Жеке құрылыс салушыларды тұрғын үй салуға ынталандыру» бағытын жүзеге асыруға үш тарап қатысып отыр. Екінші деңгейдегі «Центркредит Банк» жеке құрылыс салушы «Восток-Клио» жауапкершілігі шектеулі серіктестігіне жеңілдікпен несие береді. Өйткені, халықтың әр санатының тұрғын үй мәселесін кешенді шешу мақсатында Елбасының тапсырмасымен қолға алынған осы бағдарламаның аясында мемлекет «Даму» АҚ арқылы жеке құрылыс салушылардың несиелері бойынша сыйақы мөлшерлемесінің 7 пайызын субсидиялап отыр. Мұның өзі салынған тұрғын үйдің шаршы метрінің құнын төмендетуге мүмкіндік беріпті. Мәселен, аталған үйдің нарықтағы бағасы шаршы метріне 200 мың теңге болса, ұсынылып отырған баспананың шаршы метрі - 175 мың теңге. «Қазақстанның тұрғын үй-құрылыс жинақ банкі» акционерлік қоғамының облыстық филиалы бұл пәтерлердің 50 пайызын өз салымшыларына ұсынады. Тұрғын үй рәсімдеуде азаматтардың жасына қарамайды. Үй құнының 30 пайызын төлеп, әрі қарай несие төлеуге жалақысы жететін болса, кез келген азамат баспана ала алады. Өңірімізде тұрғын үй құрылысы қарқынды дамып келеді. «Қазақстанның тұрғын үй-құрылыс жинақ банкі» салымшыларының саны 78 мыңнан асты. Бүгінгі таңда банктен шот ашуға жеңілдік жасалып, тегін жүргізіліп жатыр. Шотқа белгілі мерзімге дейін қаржы жинаған соң салымшыларымыз ипотека ғана емес, сонымен қатар жеке үй салуына, баспанасын жөндеу жұмыстарына қажетті несиені банктен арзан пайызбен ала алады. Биыл жыл соңына дейін 1142 салымшы өз баспаналарының кілтіне ие болады. Ал алдағы 2018 жылы тағы да бір мыңнан астам пәтер салымшыларға ұсынылады»,-дейді «Қазақстанның тұрғын үй-құрылыс жинақ банкі» акционерлік қоғамы облыстық филиалының директоры Н.Күзембаев.
Азамат ҚАСЫМ,
«Егемен Қазақстан»
ӨСКЕМЕН
