Акцияның тұсауы ақын есімімен ұлықталатын гуманитарлық колледж жанындағы жалпы білім беретін мектеп-лицейде кесілді. «Рухани жаңғыру» бағдарламасы шеңберінде өткен басқосуға мұғалімдердің біліктілігін арттыру институты филиалынан, Жұмабаев ауданынан өкілдер, студент-жастар қатысып, шайырдың өмірі мен шығармашылығының беймәлім сырлары әңгімеленді. Мектеп-лицей ұжымы «арыстандай айбатты, жолбарыстай қайратты» ізбасарлар дайындау жолында қалыптасқан тәжірибелерін ортаға салды. Жұмыс істеп келе жатқаннан бері 15 түлек «Алтын белгіге» ие болған. Республикада «100 үздік мектеп» қатарына енген.
Мерейтой қарсаңында кең қанат жайған іс-шараларға Шал ақын, Жамбыл, Есіл, Тимирязев, Қызылжар аудандары қызу үн қосса, енді, міне, «Ақын жүрген жерлермен» акциясы өз сапарын туған жерінен бастайтын болады. Одан әрі эстафета аудандарға кезектесіп жалғасып отырады. Акцияға қатысушылар «Жыр қоржыны» кітабын өзерімен бірге алып жүреді. Онда жас ақындардың арнау жылдарымен қоса тұрғындардың ізгі тілек-өтініштері де топтастырылады. М.Жұмабаев аудандық білім бөлімінің жетекшісі Рысжан Нұрғалиеваның айтуынша, 45 мектепте білім алатын 3700-ге жуық шәкірт арасында Мағжанның жырларын білмейтіндер кемде-кем. Жас буынды отансүйгіштікке тәрбиелеуде жолындағы маңызы айрықша.
«Мағжан жүрген жерлермен» эстафетасы ақынның туған күні қарсаңында қорытындыланып, кең ауқымды іс-шараға ұласады.
Өмір ЕСҚАЛИ,
«Егемен Қазақстан»
Солтүстік Қазақстан облысы
