Суретті түсірген Әсем Айып
Байқауға 10-15 жас аралығындағы 30-ға жуық оқушы қатысты. Алдымен, қазылар алқасы күйшілерді жеке-жеке тыңдап алды. Үміткерлерге баға беру барысында олардың орындау шеберлігі, әртістігі, екі қолдың қойылымы, сахналық киімі басты назарға алынды. Келесі кезекте күйшілер жекпе-жек кездесіп, күй тартыс та бас-алды. Өнерпаз өрендер Құрманғазының «Балбырауын», «Адай», Дәулеткерейдің «Түркімен», Ә.Желдібаевтың «Ерке-сылқым», Динаның «Той бастар» күйлерін және басқа халыққа кеңінен танымал шығармаларды орындап берді.
Жаһандану заманы үстемдік құра бастағанына қарамастан кішкентайларынан қолдарына домбыра ұстап, ұлттық өнерді ұлықтап жүрген ұл-қыздарға іштей риза болып, қызыға қарадық.
Аса тартысты бәйгенің бас жүлдесі облыс орталығындағы Құрманғазы атындағы №1 балалар музыка мектебінің оқушысы Айшат Бақытоваға берілді.
– Бұл жеңісімді ұстазым Қуаныш Мейрамұлына арнаймын. Бұл сында Төлеген Момбековтің «Салтанат» күйін орындадым, – дейді Айшат қуанышын жасыра алмай.
Ал 1-ші орынды Екібастұздағы балалар музыка мектебінің оқушысы Арман Серіков, 2-ші орынды Павлодардағы №2 мектептің оқушысы Айдос Әубәкіров пен №35 мектептің оқушысы Дариға Сахиева иеленсе, 3-ші орынды Ертіс ауданы балалар өнер мектебінің оқушысы Айман Ілияшева мен Оқушылар сарайының «Жас екпін» домбыра ансамблінің мүшесі Әсемгүл Тоқбаева алды.
Фарида Бықай,
«Егемен Қазақстан»
Павлодар
