Атырау облысы Қазақстан халқы Ассамблеясы және «Қоғамдық келісім» мекемесі ұйымдастырған шарада ҚХА ғылыми-сарапшылық тобының мүшесі, тарих ғылымдарының кандидаты Гүлфайруз Қайырғалиева қазақ тіліне аударылған 18 ғылыми оқулықтың маңыздылығын жан-жақты түсіндірді.
Шетелдерде қымбатқа бағаланатын оқулықтарға Мемлекет басшысының тапсырмасымен қазақстандық студенттер алдағы оқу жылынан бастап тегін қол жеткізе алады. «Әлемдік деңгейдегі құнды қазынамен танысу жастарға серпін сыйлары анық, дейді тарих ғылымдарының кандидаты Гүлфайруз Қайырғалиева. – Адамзаттың даму тарихын меңгеріп, дүниетанымын кеңейткісі келетін әр студент осы кітаптарды оқуы керек».
Атыраудағы Назарбаев зияткерлік мектебінде де шара өтіп, Қазақстан халқы Ассамблеясының облыстағы хатшылығының басшысы Гүлмира Шәкірова баяндама жасады.
Баламасы жоқ бастаманың мән-маңызын түсіндіру бағытында аймақта басқа да шаралар атқарылып жатыр. Бұл жаңалыққа студенттер ғана емес, мектеп оқушылары да қуанышты. Солардың бірі – Қуаныш Жалғасбаев. Ол әлемге әйгілі шығармалардың қазақ тіліне түпнұсқадан тікелей аударылғаны маңызды екенін айтады. «Білім аламын деген жастарға күн сайын жаңа мүмкіндіктер әлемі ашылып жатқанын білу және сол елдің ертеңі болу мерей әрі жауапкершілік», дейді оқушы.
Бақытгүл БАБАШ,
«Егемен Қазақстан»
АТЫРАУ
