Іс-шара Қазақстан Республикасы Ұлттық музейінің ғылыми-әдістемелік қызметі, Қазақстан тарихы бөлімінің ұйымдастыруымен өтті. Оған Астана қаласы ардагерлер кеңесінің өкілдері, Ардагерлер ұйымы республикалық қоғамдық бірлестігі Орталық кеңесі төрағасының орынбасары Өмірзақ Озғанбай, мемлекеттік мекемелердің, мәдениет саласының қызметкерлері, сондай-ақ мектеп оқушылары қатысты.
Салтанатты жиынның мақсаты – Қасым Қайсеновтің ерлігін өскелең ұрпақтың бойына сіңіру, олардың патриоттық сезімін ояту.
– Сұрапыл соғыс адамзатқа құлақ естімеген, көз көрмеген қиындықтарды алып келді. Соның салдарынан 50 миллион адам қаза тапты. Ал оның 27 миллионы елін, жерін қорғаған Кеңес Одағының Батырлары еді. Ал Қазақ елінен бір миллионнан астам адам соғысқа аттанды. Яғни сол кездегі Қазақстан халқының 25 пайызы қатысты. Оның 600 мыңы соғыс даласында шейіт болды. Мұндай көрсеткіш Кеңес Одағының құрамындағы республикалардың ешқайсысында болмаған, – деп еске алды Өмірзақ Озғанбай.
Сөз арасында ол еңбек армиясында 700 мың қазақстандық болғанын айтып берді. Бұдан бөлек Қасым Қайсеновпен талай рет дастарқандас болғанын тілге тиек ете отырып, өз аузынан естіген қызықты әңгімелерімен бөлісті.
Жиын барысында сөз алған Ұлттық музей директорының орынбасары Марал Балтышев сол кезеңдегі жұрттың қайғыдан қан жұтқан күндері, Отан үшін от кешіп, жанын берген батырлардың ерлігі біздің де, келер ұрпақтың да мәңгілік жадында болатынын айтты.
– Ұлы Жеңіске қол жеткізген қазақ жауынгерлері болатын. Олар Қасым Қайсенов, Бауыржан Момышұлы, Рейхстагқа алғаш болып ту тіккен Рақымжан Қошқарбаев секілді батырлар еді. Партизан Қасым Қайсеновтің туғанына биыл 100 жыл толып отыр. Оның еңбектері мен ерліктерін насихаттау баршамызға парыз деп білемін, – деді Марал Балтышев.
Жиын барысында «Дала өрнектері» атты Отан қорғаушыларға арналған және «Соғыс жылдарындағы қазақстандықтар» деген тақырыпта кітап көрмесі ұйымдастырылды. Бұдан бөлек жауынгерлердің медальдары, қарулары, ұстаған заттары жеке көрме ретінде таныстырылды.
Аян ӘБДУӘЛИ,
«Егемен Қазақстан»
