Бейбіт өмір мен егемендіктің берік тірегі

«Отар» 40-шы әскери базасында Қазақстан Республикасы Қарулы Күштерінің Отан қорғаушы күніне арналған әскери шеруі өтті. 3 мыңға жуық жауынгер, 300 бірлік әскери техника мен қару-жарақ, 40 ұшу аппараты жұмылдырылған бұл айтулы шараға Қазақстан Президенті – Қарулы Күштердің Жоғарғы Бас қолбасшысы Нұрсұлтан Назарбаев қатысты.

Егемен Қазақстан
10.05.2018 1212
2

Бірінші кезекте парад қолбасшысы – Қазақстан Республикасы Қарулы Күштері Құрлық әскерлерінің бас қол­басшысы, генерал-майор Мұрат Бекта­нов Мемлекет басшысы – Қарулы Күш­тердің Жоғарғы Бас қолбасшысы Нұрсұлтан Назарбаевқа әскери шеруді өткі­зуге және аумақтық әскерлер құра­ма­ларына жауынгерлік туларды тапсы­ру рәсіміне дайын екендігі жөнінде баян­дады.

Бұдан кейін Қазақстан Республи­касы­ның Президенті Н.Назарбаев ардагер­лерді, сарбаздар мен офицерлерді Отан қорғаушы күнімен құттықтап, еліміздің Қарулы Күштері қауіпсіздігіміздің бас­ты кепілі, Отанымыздың бейбіт өмірі мен егемендігіміздің берік тірегі болып саналатынын атап өтті.

– Қымбатты қазақстандықтар, сардарлар мен сарбаздар! Қадірлі ардагерлер! Баршаңызды Отан қорғаушы күнімен шын жүректен құттықтаймын. Баһадүр бабалар Ұлы даламызды ақ білектің күшімен, ақ найзаның ұшымен қорғап, оны бізге аманат етіп қалдырды. «Ұранды елдің ұрпағы айбарлы келеді» деген дана халқымыз. Бүгінгі айбынды армиямыз үшін елдің тыныштығын сақтап, Тәуелсіздіктің қорғаны болу мәртебелі зор міндет. Жаужүрек жауынгерлердің көтеретін жүгі ауыр. Бірақ ол абыройлы борыш, қастерлі парыз. Қарулы Күштеріміз халқымыздың сенімді тірегі, мемлекеттің берік қалқаны. Қазақстанның әскери қызметшілері – барлық дәуірдің тарихындағы ең сұрапыл соғыста фашизмді жеңген батыр бабаларымыздың жауынгерлік ерліктері мен даңқын жалғастыратын лайықты ұрпақ. Біз олардың туған жеріміздің өркендеуі мен бейбіт өмірімізді сақтау үшін көрсеткен көзсіз батырлығы мен өшпес ерлігін әрдайым жадымызда сақтаймыз, – деді Елбасы.

Мемлекет басшысы өз сөзінде әр сарбаз Отан қорғаушы ретінде өзінің ел алдындағы борышы мен міндетін терең сезінуі тиіс екенін атап өтті.

– Жауынгерлік Ту туған жерге адалдықтың, ерлік пен батылдықтың нышаны болып табылады. Қасиетті байрақ рухы биік, ержүрек сарбаздарды әрдайым жеңіске жетелейді. Бауыржан Момышұлының «Батырлық өскен ортаға, көрген тәрбиеге байланыс­ты қа­лып­тасады», деген сөзі бар. Аза­мат­тарымызды отансүйгіштікке тәрбиелеу ісін­де әскери дәстүр маңызды рөл атқа­рады. Әр сарбаз Отан қорғаушы ретінде өзінің ел алдындағы ерекше жауап­кершілігін сезінуі тиіс. Қарулы Күштері­мізде жігерлі жігіттер қатарында аяулы ару­ларымыз да әскери қызметті абырой­мен атқарып келеді. Сондықтан бүгінгі мереке ер азаматтармен қатар сап тү­зеген қайсар қыздарымызға да ортақ. Мем­лекет Отан қорғаушыларға ерекше қам­қорлық көрсетіп келеді, көрсете бе­реді. Өткен жылы әскери қызметкер­лердің жалақысы 25 пайызға артты. Әскерилерді тұрғын үймен қам­тамасыз ету мәселесі шешімін өз ретімен тауып жатыр. Мұның бәрі Қарулы Күштер сарбаздарының ар-намысы мен айбынын арттыруға жол ашады. Сондықтан мен сіздерді әскери антқа адал болады деп сенемін, – деді Елбасы.

Президент өз сөзінде бүгінде елі­міз­дің дәйекті әрі бейбітсүйгіш саясат жүр­гізіп отырғанын атап өтті. Бұл орайда Қазақ­стан әскері еліміздің Тәуелсіздігін күзе­тіп, Ұжымдық қауіпсіздік шарт ұйы­мы аясында ұжымдық қауіпсіздікті қамта­масыз етуде аянбай еңбек етіп келеді. Сонымен қатар Біріккен Ұлт­тар Ұйымы шеңберінде маңызды бітім­гер­шілік міндеттерді де лайықты түрде атқаруда.

Жауынгерлік парад кезінде Елбасы мемлекет тарапынан армиямызға мей­лінше қолдау көрсетіліп, оның әлеуетін ны­ғайтуға зор мән берілетінін және Қазақ­стан 2030 жылға қарай заманауи, мо­биль­ді әрі жоғары кәсіби әскер жасақтау жө­нінде мақсат қойып отырғанын атап өтті.

– Бұл үшін 2020 жылдан бастап қор­ғаныс саласына қажетті қаражат бөлі­нетін болады. Қауіпсіздікке төнетін жа­ңа сын-қатерлерге орай тиімді әрекет ету үшін Арнайы операциялардың жоға­ры мобильді күштері мен Аумақтық әскер­лер құрылып, қорғаныс жүйесіне бірікті­рілді. Жаңа бөлімдер бүгін табыс етілген жауынгерлік туларды лайықты алып жүретініне сенімдімін, – деді Президент.

Осы арада сәл шегіне сөйлесек, еге­мендік алған күннен бастап татулық пен бірлікті ту етіп, ынтымақты ырысы­на балаған еліміздің бұл күнде әлем мем­лекеттерінің алдында абыройы асқақ, беделі биік. Ежелден айбыны асқақ, рухы өр халықтың далалық данышпандығы мен кенен көрегендігі бүгінде Елбасы саяса­ты­ның негізгі өзегіне айналып отыр. Бабалардың өнегесі мен қайталан­бас ерлігі тәуелсіздік жылдарында елі­міз­дің болмысында жаңаша түлеп, Отан деген ұлы ұғымның, қастерлі атау­дың мәні мен маңызы ерекшелене түсті. Тәуелсіз Қазақстанның әлеуеті жоға­ры әскері қалыптасты. Әскери қызмет­шілерге, сарбаздарға деген мемлекеттің қамқор­лығы мен қолдауы артты. Әсіресе егемен еліміздің болашағы болып саналатын жастардың бойында патриоттық тәрбие қалыптастыру, оларды отансүйгіштікке баулу, туған жерге құрмет көрсету, ел айбынын асыру жолында аянбай еңбек ету Елбасы белгілеп берген нақты мақсат пен міндеттің көрінісі.

 Елбасы Нұрсұлтан Назарбаев «Еркін елде өскен ұрпақтың рухы әрдайым биік болуы тиіс. Жастары жалын жүректі, өршіл намысты, биік рухты болса – ол елдің еңсесі де биік болады. Өршіл, намысшыл жас отаншыл, патриот ке­леді, халқына, өз ұлтына адал қызмет ету­ге ұмтылады», деген болатын. Бүгін­де дамудың даңғыл жолына түскен Қазақ­стан әскерінің әлеуеті, мүмкіндігі әлемге әйгілі. Ал әскери сала сапындағы қызметшілер де, сарбаздар да ел бірлігін сақтауда, қауіпсіздікті қадағалауда қыра­ғылық танытып келеді.

 Отан қорғау – ұлы ұғым. Осы орайда Елбасы Жарлығымен 7 мамыр – Отан қорғаушы күні болып белгіленді. Бұл күні еліміз бойынша әскери қызметшілер сап түзеп, еліміздің қорғаныс саласының қарқынын дүйім жұртқа паш етіп келеді. Ал биылғы айтулы мерекенің мәні мен маңызы жылдағыдан айрықшаланып, ел тарихындағы тағылымды сәттердің сәулелі кезеңдерін қалыптастырды.

Отан қорғаушы күнін мерекелеу шең­берінде Елбасы – Қа­зақ­стан Респуб­ликасы Қарулы Күштерінің Жоғар­ғы Бас қолбасшысы Нұрсұлтан Назар­баевтың қатысуымен Жамбыл облысы Қордай ауданы Гвардейский кентінде орналасқан «Отар» 40-шы әскери базасында өткен бұл әскери шеру екі бөлімнен тұрды. Алғашқы бөлімде аумақтық қорғаныс бригадаларының жауынгерлік тулары облыстардың, сон­­дай-ақ Астана және Алматы қала­лары­ның әкімдеріне тапсырылды. Әкім­дерге Ту тапсыру рәсімінен кейін Ар­наулы опера­циялар күштерінің, Мемлекеттік күзет қыз­метінің, Ұлттық ұланның, Әскери-теңіз күштерінің арнаулы мақсаттағы отря­дының, сонымен қатар аумақтық әс­керлердің әскери қызметшілерінің па­рад­қа қатысушы құрамдары сап түзеп өтті.

Жауынгерлік парадтың екінші бөліміндегі заманауи қару-жарақ пен әскери техниканы ұрыста қолдана отырып, барлау-әскери бөлімшелерінің шынайы тактикалық іс-қимылы келушілерді бей-жай қалдырмады. Заңсыз қарулы құрылымдардың шартты базасын жою жөніндегі тактикалық эпизодтарды орындау барысы Қазақстан Қарулы Күштерінің кемелдігін көрсетті. Жауынгерлік парад кезінде көпшілік тамашалаған «Точка-У» тактикалық зымыран кешені, «Град» және «Прима» дүркіндетіп отшашу зымыран жүйесі, МСТА-Б және Д-30 зеңбіректері, «Солнцепек» ауыр отшашқыш зымыран жүйесі, «Штурм-С» танкіге қарсы зымыран кешені және Ракета әскерлері мен артиллерияның басқа да қару түрлерінің мүмкіндіктері аталған парадтың жоғары деңгейде ұйымдастырылғанын көрсетті. 

Байтақ даламыздың бірлігін әйгілейтін, егемен еліміздің ерекшелігін танытатын көріністер келушілердің өз Отанына деген патриоттық және мақтаныш сезімдерін оятты.

Сонымен қатар 3 мыңға жуық әске­ри қызметші, 300 бірлік қару-жарақ пен 40 бірлік ұшу аппараты жұмыл­дырылған жауынгерлік парад барысында Құрлық әскерлері және Әуе қорға­нысы күштерінің әскерлері зымыран атып, бомба лақтырды, сондай-ақ бар­лық қару түрінен оқ атты. Ал Әскери-әуе күштерінің майдандық және әс­кери авиациясының ұшақтары мен тікұшақ­тары аспанға көтеріліп, әуе іс-қимыл­дарын көрсетті. Әуеде өз ше­бер­ліктерін майдандық, армиялық және әскери-көлік авиациясы, С-295 су жа­ңа әскери-көлік ұшақтары мен Су-30 көп­ нысаналы жойғыштары паш етті. Парад кезінде «Жетісу Барысы» ұшқыштар тобы жоғары деңгейде шеберлік танытты.

Бұл Елбасы – Қазақстан Республикасы Қарулы Күштерінің Жоғарғы Бас қол­бас­шысы Нұрсұлтан Назарбаевтың қа­ты­суымен ел аумағында өткен, мем­лекетіміз үшін тарихи маңызы зор екінші жауынгерлік парад болып табылады. Биылғы жылғы парадтың ерекшелігі, заманауи қару-жарақ пен әскери техни­каны, авиацияны жауынгерлік тұр­ғы­да қолдана отырып, барлау бөлім­ше­лерінің шынайы тактикалық іс-қимыл­дарын көрсету болды. Қазақстан әскер­лерінің іс жүзіндегі әрекеттерін жұртшы­лық республикалық телеарналар және Қорғаныс министрлігінің ресми сай­ты арқылы тікелей эфирден тамашалады. Со­нымен қатар полигон аумағында жүр­гізілген командалық-штабтық жаттығу­лардың нәтижесінде көрермендер Қазақ­стан армиясының жан-жақты мүмкін­дігіне куә болды.

Жауынгерлік парад соңында Қазақ­стан Республикасының Президенті Нұрсұлтан Назарбаев әскери техника мен қару-жа­рақтың заманауи үлгілері­мен танысты. Со­нымен қатар Елбасы Жауынгерлік па­­радқа қатысушы азамат­тарға далалық жер­дегі ұрыста көрсет­кен шеберліктері, оқ ату сәтіндегі мерген­діктері және жауын­­гер­лік дайындықтары үшін алғы­сын білдірді.

 – Әскери парад сіздердің жауынгерлік шеберлік деңгейлеріңізді және даладағы жаттығуларға бейімделгендеріңізді нақты көрсетті. Парад Қазақстан Респуб­ликасы Қарулы Күштерінің жауынгерлік дайындығы мен кәсіби деңгейінің одан әрі арта түсуіне септігін тигізеді деп сенемін, – деді Нұрсұлтан Назарбаев.

Сонымен қатар Қазақстан Рес­пуб­ликасы Қарулы Күштерінің Жоғарғы Бас қолбасшысы барша азаматтарды Отан қорғаушы күнімен және Ұлы Жеңіс кү­німен құттықтады.

Отан қорғау – мемлекет алдындағы мәртебелі міндеттің бірі. Заманында бөрілі байрақ көтерген бабаларымыздың ама­натына адалдық – бүгінгі парыз. Ел­­басы сенімі әрдайым ел азаматта­ры­на соны серпін беріп, биік рух сыйлайтыны, сонымен қатар Отан үшін зор жауапкершілік артатыны ақиқат. Ешқашан Туы төмен түспеген, еңсесі еңкеймеген еліміздің байрағы болашақта да биікте желбірей беретініне сенім мол!

Ғалым СҮЛЕЙМЕН,

Хамит ЕСАМАН,

«Егемен Қазақстан»

Жамбыл облысы,

Қордай ауданы

СОҢҒЫ ЖАҢАЛЫҚТАР

23.09.2018

Астанада ТҚО объектілерді қорғаудың цифрлық басқару жүйесі ұсынылды

23.09.2018

Екібастұзда алғашқы STEM-зертханасы ашылды

23.09.2018

Маңғыстауда VI Халық спорты ойындары басталды

23.09.2018

Астаналықтар заң мәселесі бойынша тегін кеңес алды

23.09.2018

Ақтауда триатлоннан Қазақстан Кубогының финалы басталды

22.09.2018

Жалпықалалық сенбілікте 9 мыңнан астам ағаш егілді

22.09.2018

Мақтаарал ауданында «Жасыл ел» жастардың еңбек жасақтары жұмысын бастады

22.09.2018

«Балалар Евровидениесі» байқауының жеңімпазы анықталмақ

22.09.2018

Халықаралық «Ясауитану-2018» байқауы өз мәресіне жетті

22.09.2018

Елбасы елорданың қала құрылысын игеру жоспарымен танысты

22.09.2018

Даниал Ахметов Зырян ауданын Алтай деп атау туралы ұсынысты қолдады

22.09.2018

Елбасы Чан Дай Куангтің қайтыс болуына байланысты көңіл айтты

22.09.2018

Жаңа Жібек жолы: Алматы

22.09.2018

Катонқарағай ауданы тұрғынының сібір жарасынан көз жұмғаны расталды

22.09.2018

Сенаторлар сенбілікке шықты

22.09.2018

Б.Бекназаров Әзербайжан Парламентінің 100-жылдығына арналған шараға қатысты

22.09.2018

Мұнайдың әлемдік бағасы өсті

22.09.2018

Лондонда қазақстандық өнер көрмесі ашылды

22.09.2018

Түркия «Қазақстан» журналын шығарды

22.09.2018

Ақтөбеде «Анаға тағзым» орталығы ашылды

ТАҒЫ ЖҮКТЕУ
КОЛУМНИСТЕР

Қарашаш ТОҚСАНБАЙ, «Егемен Қазақстан»

Qasiet pen qasiret

«Dánikkennen qunyqqan jaman» degen sózge mán bersek, munda úlken fılosofııalyq maǵyna bar. Táýba, bireý bireýden nan surap jeıtin zaman emes qazir. Toqshylyq zaman. О́zimizdi qoı ústine boztorǵaı jumyrtqalaǵan barshylyqta, etek-jeńniń keń kezinde dúnıege kelgen, zárýlik kúıin sezinbeı ósken urpaqqa balaımyz. Dastarqannan nan, maı, qant, sút, qaımaq eshqashan úzilgen emes. Sonymyzben baı sanalmasaq ta, bardyń sanatynan bolatynbyz... Qudaı saqtaı gór, taǵamǵa talǵam-talabymyzdyń sharyqtap ósip ketkeni sonshalyq keıde dastarqannan búginde nan qoıylatyn bos oryn tappaı qınalatynymyz ras. Sóıte tura, toqshylyq zamanda ómir súrip jatqanymyzdy sezinbeıtinimiz jaman. Moıyndaǵymyz kelmeıtini qorqynyshty. 

Сұңғат ӘЛІПБАЙ, «Егемен Қазақстан»

Minez adamnyń taǵdyry ma?

Qazir Elbasynyń «Bolashaqqa baǵdar: rýhanı jańǵyrý» baǵdarlamasy týraly jıi áńgime qozǵalýda. Jańa turpatty jańǵyrýdyń eń basty sharty – ulttyq kodyńdy saqtaı bilý, ıaǵnı zaman jańalyqtaryn qabyldaı, oǵan ún qosa otyryp, basqa ulttardan árdaıym erekshelendirip turatyn ózińniń ulttyq bolmysyńdy, qazaqy qalybyńdy damyta bilý ekendigi aıtylýda.

Жұмабай ШАШТАЙҰЛЫ, «Егемен Қазақстан»

Esti men eski

Elektrondy aqparat quraldaryn qosa qalsań-aq jarq etip shyǵa keletin ánshilerdiń bitim-bolmystarynan syr aýlaı uzaq qadalatynyń bar. Qyz-jigitterdiń arasynda burynnan biletiniń ıa qatarǵa jańa-jańa ilingenderiniń oryndaǵan ánderine qulaı elikpeseń de – beker obaldary káne, beıjaı tyńdap otyrǵyzbaıtyn izdenisteriniń qýaty barshylyq. Bul salanyń jetik bilgiri sanalmasań da, tańdaǵan repertýaryna ózińshe kóńil aýdaryp, naqyshyn ishki tarazyńmen ólshep, órnek ıirimin oısha saraptaısyń ǵoı, baıaǵy. 

Ермухамед Мәулен, «Егемен Қазақстан»

Boljam aıtyp baıyǵandar

Sport bızneske aınalǵaly qashan. Árıne bul sózben qazir eshkim daýlasa almaıdy. Álemdegi eń baı adamdar sportshylar ekeni anyq. Alaıda osy sport bıznesi salasynda alaıaqtyq ta joq emes. Ásirese bás tigip aqsha tabatyndar men qandaı báske qoıý kerektigin usynatyndardan aıaq alyp júre almaısyz. Keńes beretin keń­seler men aqyl aıtyp otyratyn saıttar qap­tady. Aldaǵy ýaqytta alaıaqtardyń arbaýyna túspes úshin bul júıeniń qalaı áreket etetinin aıtyp óteıin. 

Сұңғат ӘЛІПБАЙ, «Егемен Қазақстан»

Naǵyz Báıterek

Qazirgi baspasóz betterinde, buqaralyq aqparat quraldarynda «Báıterek» degen sóz teńeý retinde kóbinese qoǵamǵa eńbegi sińgen nemese ómir jolynda jeke basy jaqsy tabystarǵa jetken, sodan halyqtyń kózine túsken adamdarǵa qatysty qoldanylyp júr. Durys-aq. Ondaı adamdardyń eńbegi halyq ıgiligine jarap jatsa, sol ıgilikten kóptegen adamdar nár alyp, turmysyn jaqsartsa nemese sol adamnan úlgi alý arqyly urpaǵyna durys tárbıe, baǵyt-baǵdar berse, tipti basqany bylaı qoıǵanda, et jaqyn týystary, aýyldastary sonyń saıasynan pana taýyp, sol arqyly ómirin durys arnada jalǵastyryp jatsa, nege qoldanbasqa. Rasynda da, mundaı adamdar «Báıterek» degen atqa ábden laıyq qoı.

ҰҚСАС ЖАҢАЛЫҚТАР

Тағы да оқу

Пікірлер(0)

Пікір қосу