Жиынға Астана қаласы мәдениет және спорт басқармасының басшысы Болат Мажағұлов, Парламент Мәжілісінің депутаты, Қазақстан Республикасының еңбек сіңірген әртісі Бекболат Тілеухан, Қазақстанның еңбек сіңірген әртісі, күйші Секен Тұрысбек, профессор, күйші Айтжан Тоқтаған және Астана қаласы әкімдігінің Мемлекеттік академиялық филармониясы Қазақ оркестрінің көркемдік жетекшісі әрі бас режиссері, композитор Айтқали Жайымов қатысты.
Елбасы Нұрсұлтан Назарбаевтың Жарлығымен бекітілген жаңа мейрам – Ұлттық домбыра күні жыл сайын шілде айының алғашқы жексенбісінде аталып өтілетін болады. Биыл бұл мерекенің тұсаукесері 1 шілдеге тура келіп отыр. Айтулы домбыра думанына қатысуға қазірдің өзінде 1300-ден аса өтінім келіп түскен.
– Ұлттық домбыра күніне орай еліміздің мыңдаған музыкант домбырашысының қатысуымен өтетін «Домбыра – асыл мұра» атты концерт аталған мерекенің көркін келтіріп, қазақ даласын ұлттық аспаптың күмбіріне бөлейтіні сөзсіз. Айтулы шарада өнер жанашырлары танымал қоғам қайраткерлері Секен Тұрысбек, Бекболат Тілеухан, Айтжан Тоқтаған, Айтқали Жайымов, Айгүл Үлкенбаева, Нұржан Тәжікенов, Асылбек Еңсепов, «Арт домбыра» триосы мен «МузАрт» тобы бастаған өнерпаздардың өнерін тамашалайды. Сонымен қатар аталған шараның тағы бір ерекшелігі – мерекелік концертке asyldombyra.kz сайтында онлайн тіркеліп, «Көңілашар», «Адай», «Балбырауын», «Сарыарқа», «Ерке сылқым» күйлерін жатқа білетін кез келген орындаушы қатыса алады. Арқа төсін күмбірлеген домбыра үніне, ұлттық рухқа бөлейтін мұндай ауқымды шара елордада бұрын-соңды болған емес», – деп Б.Мажағұлов айтулы думанның негізгі ерекшелігі мен маңызына тоқталып өтті.
Жоғарыда аталған тізімнен бөлек, бас шаһардағы Ұлттық домбыра күнін мерекелеуге, сондай-ақ Құрманғазы атындағы Қазақ мемлекеттік ұлттық аспаптар оркестрі, «Отырар сазы» ұлттық аспаптардың фольклорлық-этнографиялық оркестрі, Астана қаласының мемлекеттік академиялық филармониясының Ұлттық аспаптар оркестрі және Ақтау қаласының Қазақ ұлттық аспаптар оркестрі арнайы келіп өнер көрсетеді.
Мәдениет және спорт басқармасының басшысы Болат Бауыржанұлының айтуынша, Ұлттық домбыра күнінің құрметіне Астанада халықтық серуен ұйымдастыру жоспарлануда. Мұнда өнер жанкүйерлері мен қала қонақтары аталған шараға арнайы тігілген киіз үйлердің ішінен домбырадан бөлек, басқа да ұлттық аспаптардың сан алуан түрін көріп, олардың тарихымен танысуға мүмкіндік алады. Кәсіби музыканттар халық шығармаларын орындайды. Сонымен қатар дәл осы күні жиналған қауым домбыра жасау барысымен танысып, «Қазақ Елі» монументі алдындағы алаңда Ортеке өнерін де тамашалай алады.
– 1 шілдеде «Қазақ Елі» монументінің алдындағы алаңда халықтық серуен өтеді. Киіз үйлер тігіліп, қазақ ұлттық аспаптарының музейі ашылады. Музейде Құрманғазы, Дина Нұрпейісова, Ахмет Жұбанов және тағы да басқа көптеген күй өнері шеберлерінің тартқан домбыралары көпшілік назарына ұсынылады. Өйткені домбыраның қазақ өмірінен алар орны үлкен. Өскелең ұрпақты ұлтжандылыққа, рухани тереңдікке тәрбиелейміз десек, бұл шараның мәні орасан. Бұған Елбасымыз да өзінің «Рухани жаңғыру» бағдарламалық мақаласында айрықша назар аудартқан болатын. Домбыра секілді басқа ешбір музыкалық аспап ұлтымызды осылай біріктіріп, рухымызды көтере аламайды», – деді Б.Мажағұлов.
Көмейінен күмбірлі күй төгілген қасиетті қазақ аспабы, міне, енді дәстүрлі түрде жыл сайын ұлттық деңгейде аталып өтілетін болады. Мемлекет басшысы Нұрсұлтан Назарбаевтың қолдауымен жүзеге асып жатқан айтулы домбыра думаны Астананың 20 жылдығына үлкен тарту болады деп күтілуде.
Назерке ЖҰМАБАЙ,
«Егемен Қазақстан»