THE GUARDIAN
Түркия сайлауға дайындалып жатыр
Осы жексенбіде Түркияда жалпы сайлау өтеді. Электораттар ел президенті мен парламент мүшелерін анықтайды. Президенттік сайлауға 6 үміткер түссе, парламенттік дауыс беруге 8 партия қатысады.
The Guardian газеті Түркияда оппозицияның күш алып келе жатқанына қарамастан, қазіргі президент Режеп Тайип Ердоғанның басым түсетінін болжап отыр.
«Р.Т.Ердоған ел басқарған 16 жыл ішінде сайлаулардың бәрінде жеңіске жетіп, Түркияның Таяу Шығыстағы ең алып күшке айналып келе жатқанын әрдайым айтып келеді. Соның дәлелі іспетті елдегі ең үлкен қала – Ыстанбұл түрлі жаһандық жобалардың орталығына айналды. Үкімет қазанда Ыстанбұлда жылына 90 миллион жолаушыға қызмет көрсете алатын үшінші әуежайдың құрылысын аяқтауды жоспарлап отыр. Сондай-ақ Мәрмәр теңізі мен Қара теңізді жалғайтын Босфор бұғазы арқылы өтетін жоба миллиардтаған долларды қажет етеді», дейді The Guardian.
Басылымның пайымдауынша, Р.Ердоған басқаратын Әділет және даму партиясы парламентте аз орын алуы ықтимал. Әйтсе де өзін мұсылман әлемі мен елінің көсемі ретінде көрсеткен 64 жастағы қазіргі президент өз орнын сақтап қалмақ.
«Ердоған мен Әділет және даму партиясы сайлаушыларға екі уәде беріп отыр: экономикалық өсім және демократия. Президентті қолдайтындар оның қоғамдық сеніміне үлкен құрмет көрсетеді. Мәселен, Ердоғанның билігі кезінде парламентте, университеттерде және қоғамдық ғимараттарда орамал тағуға рұқсат етілді», дейді The Guardian газеті.
Басылымның деректеріне сай, дербес сауалдамалар Р.Ердоғанның бірінші айналымда-ақ жеңіске жететінін көрсетіп отыр.
ALJAZEERA
68,5 миллион адам босқын
БҰҰ босқындар жөніндегі агенттігі әлемде 68,5 миллион адам өз елінен безіп, босқынға айналғанын айтады. Ұйымның мәліметіне сай, босқындардың 53 пайызы балалар екен.
Адамдардың көбі соғыс, қатыгездік және қудалаудың кесірінен өз үйін тастап қашқан. Агенттік осы мәселеге байланысты арнайы зерттеу жүргізген көрінеді. Аталған зерттеуге сүйенсек, Оңтүстік Судан, Конго Демократиялық Республикасындағы жағдай, Мьянмадағы рохинджа мәселесі әлі күнге дейін толық шешілмеген. Осының салдарынан 2017 жылы босқындар саны 68,5 миллионға жеткен.
Al Jazeera арнасының хабарлауынша, былтырдың өзінде 16,2 миллион адам босқынға айналған. Яғни, күн сайын орта есеппен 44 000 адам өз үйінен кетуге мәжбүр болған.
«Бұл жаһандық деңгейде халықаралық келісім мен ынтымақтастықты қажет ететін мәселе. Босқындар соғыс, қуғын және қиыншылық әсерінен өз елін тастап шығады. Оларға көмектесуіміз қажет» дейді Al Jazeera арнасына сұхбат берген БҰҰ Босқындар жөніндегі жоғарғы комиссары Филиппо Гранди.
Қазіргі таңда әр бес босқынның төртеуі өз елімен шектесетін мемлекетте уақытша мекен етуде. Сондықтан Ф.Гранди Түркия, Пәкістан, Уганда секілді мемлекеттерге халықаралық қоғамдастық тарапынан көмек қажет, деді.
EURONEWS
Еуроаймақтың бюджеті құрылады
Германия канцлері Ангела Меркель мен Франция президенті Эммануэль Макрон инвестиция тарту мен блокқа кіретін елдердің экономикасын жақындастыру мақсатында Еуроаймақ бюджетін құру туралы келісімге қол жеткізді.
Euronews арнасының мәліметінше, келісімге Еуропалық одақтың саммиті қарсаңында қол жеткізілген. Э.Макронның пайымдауынша, Еуропалық аймақты нығайту мақсатында бірқатар реформалар қабылдау қажет. Ал А.Меркель бұл мәселеде аса мұқият болу қажеттігін ескертеді.
«Біз тарихтың жаңа парақтарын ашып отырмыз. Еуропалық аймақтың бюджеті инвестицияны көбейтіп, қаржы айналымын жақындастыру мақсатында жұмыс істейді. Экономикалық және қаржылық одақ экономикалық саясат жақындасқанда ғана сақталатынын жақсы білеміз», дейді А.Меркель.
Еуропалық экономикаға қаржылық қауіп төніп тұрмағанына қарамастан, кейбір сарапшылар бірегей валютаны қорғау үшін реформа қажет екенін алға тартады. Осыған байланысты А.Меркель Еуропалық аймақ бюджетін Германия үкіметі мен Бундестагтың қолдайтынына үміт білдірді. Э.Макронның айтуынша, бюджет 2021 жылдан бастап іске қосылмақ. Оның көлемі, қаржыландыру көздері жыл соңына дейін тиісті министрліктер тарапынан әзірленеді.
Дайындаған
Абай АСАНКЕЛДІҰЛЫ,
«Егемен Қазақстан»