Шырайлы-шұғылалы, пейілі кең, мейірі мол тұрғындары бар, қайырымды қала Шымкентіңіз бен түркі әлемінің текті төрі, еліміздің рухани астанасы Түркістаныңызға байланысты ұлан-асыр, ақжарылқап, ақжолтай қуанышымыз құтты болсын! Ұзағынан сүйіндірсін.
Жасампаз Жарлығын жарияларда Елбасымыз екі ауыз сөзбен-ақ Шымкентке де, Түркістанға да айрықша анықтамалар айшықтап, басты-басты мақсаттар мен міндеттерді айқындап берді.
Түркістан топырағында ұлы шайырымыз, данышпан ойшылымыз, теңдесі жоқ діндар ұстазымыз Ахмет Ясауидің, небір хандарымыз бен сұлтандарымыздың, билеріміз бен батырларымыздың, қолбасшы қайраткерлеріміздің асыл сүйектері жатыр. Түркі дүниесіне ортақ төр, Қазақ хандығының астанасы болған, Ұлы Жібек жолының бойындағы ұлық қаланың, Түркістаннан Түркібасыға, Мырзашөл – Мақтааралдан Отырар – Созаққа созылып жатқан уәлаяттың, шуақты Шымкент шаһарының келешегі кемел, болашағы берекелі.
Ахмет Ясауи бабамыз: «Өз дініңдегіні дос тұт, өзге діндердегіні де дұшпан тұтпа» деген. Сөйтіп түркі тіліне, мұсылман дініне қалтқысыз қызмет етпектің өшпес өнегесін танытқан. Өлмес мұралар қалдырған. Алаш ардақтылары Түркістан дейтұғын атауды ту етіп көтерген, мәңгілік етпекті армандаған. Мінекиіңіз, енді сол армандар мен аңсарлар орындалып отырыпты.
Облысымыздың Түркістан аталуы, Шымкентіміздің жоғары мәртебе алуы, Мақтаарал мен Сарыағашта екі бірдей ауданның енші бөлісіп, өз алдарына отау тігуі – мұның бәрі де рухани жаңғыруымыздың нақты нәтижелері. Жеңістері мен жемістері.
Бәзбір кісілер Оңтүстік Қазақстан атауын қимаймыз деседі. Қимастық – қасиетті сезім. Алайда Түркістан ұғымы – ұлы ұғым. Оңтүстік деген ұғым да алаштың ауызекі ақындар айтысы секілді ауызекі түрде айтыла берер. Мемлекет басшысы тәуелсіздіктің әуелгі жылдарында: «Оңтүстікте бірлік-ынтымақ, бақ-береке болса, бүкіл Қазақстанымызда бірлік-ынтымақ, бақ-береке болады» деген.
Кешегі ОҚО, бүгінгі Түркістан облысының, Шымқаланың басшыларына да, қосшыларына да, бүкіл жұртшылығына да жоғары жауапкершілік жүктеліп отыр. Ол – Ұлыстың ұйытқысы, алтын құрсақты аймақ атына бұрынғыдан бетер берік те бекем болмақ, бірлік пен ынтымақты көздің қарашығындай сақтап, жұмыла жұмыс істемек жауапкершілігі.
Қазақ елінде қуаныштар көбейе берсін.
Мархабат БАЙҒҰТ,
жазушы, Қазақстанның еңбек сіңірген қайраткері