Бұдан кейін Астана қаласының әкімі Әсет Исекешев пен Қарағанды облысының әкімі Ерлан Қошанов кеншілер астанасында өткен «Өңіраралық ынтымақтастық: Астана қаласы – Қарағанды облысы» атты бизнес-форумға қатысты.
Аймақаралық ынтымақтастықты дамыту мәселелері жан-жақты сөз болған жиынның салтанатты ашылуында Қарағанды облысының әкімі Ерлан Қошанов қонақтарды Астананың алда келе жатқан мерейтойымен құттықтады.
– Астананың құрылысына Қарағанды облысы белсене қатысты. Бүгінде біздің көптеген жерлестеріміз елордада жұмыс істейді. Жалпы, Астана мен Қарағанды облысының серіктестігі сәтті болып отыр. Қарағанды облысының орналасқан жері мен инфрақұрылымы өте қолайлы. Биыл Астана – Қарағанды автобанының құрылысы аяқталады, бұл біздің қалаларымызды одан әрі жақындата түседі, – деп атап өтті өңір басшысы.
Жалпы, алқалы жиында «Смарт-сити» қанатқақты жобасы, денсаулық сақтау саласындағы цифрландыру, мемлекет-жекеменшік әріптестігі механизмін іске асыру тәжірибесі, кооперация жүйесі бойынша өндірістік өнімдерді өндіру және жеткізу, елорданың азық-түлік белдеуінің мүмкіндігін арттыру және өңірдің басқа да даму басымдықтары негізгі әңгімеге арқау болды. Қарағанды облысының әкімі Ерлан Қошанов Smart City жобасын іске асыруда бірлесе жұмыс істеуді ұсынды. Оның пікірінше, аймақаралық ынтымақтастықты туризм, кәсіпкерлік және сандық технологиялар салаларында дамыту керек.
Қазіргі таңда Қарағанды облысының ауыл шаруашылығы тауарларын өндіруші екі мыңнан астам кәсіпорын елорда нарығымен тығыз қарым-қатынас орнатқан. Былтыр олар Астана қаласына 25 миллиард теңгенің өнімін жеткізген екен. Ал келесі жылы бұл көрсеткіштің көлемін 40 пайызға арттыру жоспарланыпты.
Жиында Астананың әкімі елорданың бүгінгі тыныс-тіршілігінен мол мағлұмат берді. Қазіргі таңда еліміздің бас қаласында шағын және орта бизнестің 100 мыңнан астам субъектілері жұмыс істейді екен. Олардың экономикалық құрылымдағы үлесі 58%-ды құрайды. Урбанизация мен көші-қон үдерісін бастан кешіп жатқан елордада халық саны артып, құрылыс белсенді түрде жүргізіліп жатыр. Жиырма жылдың ішінде Астанаға 8 триллион теңге инвестиция салынған. Әкімнің айтуынша, бюджеттен бөлінген 3 триллион теңге қаржы екі есеге жуық өтелген. «Мегаполистің қарқынды дамуы еңбек ресурсын қажет етеді, кадрларға деген сұраныс артады. Бірқатар мамандық иелерінің жетіспеушілігі сезіледі. Мысалы, бүгінде автобус жүргізушілері керек. Алдағы бес жылда Астанада 150 мың жаңа жұмыс орнын ашу көзделген», – деді Әсет Исекешев.
Форум аясында төрт бірдей меморандумға қол қойылды. Атап айтқанда, Астана қаласының әкімдігі мен Қарағанды облысының әкімдігі, «Астана Конвеншн Бюросы» ЖШС мен Қарағанды облысының кәсіпкерлік басқармасы, «Астана Innovations» АҚ пен Қарағанды облысының ақпараттандыру, мемлекеттік қызметтер көрсету және мұрағаттар басқармасы, «Астана» ӘКК» ҰК» АҚ пен «Сарыарқа» ӘКК» ҰК» АҚ арасында өзара ынтымақтастық туралы келісімдерге қол жеткізілді.
* * *
«Астана қаласының күндері» фестивалінің аясында бірқатар мәдени шаралар жүзеге асырылды. Кеншілердің мәдениет сарайында «Ақ тілекпен, Астана!» атты көрме өтті. Онда елордадағы Тәуелсіздік сарайының қорынан алынған қазақстандық өнер шеберлерінің 60-қа жуық туындысы қойылып, жұрт назарына ұсынылды.
Көрмеден кейін қарағандылық өнерсүйер қауым «Астанадан ақ тілек!» атты айта жүрерлік концерттің куәсі болды. Кеште Астана қаласының Мемлекеттік академиялық филармониясының қазақ оркестрі, «Шалқыма» халық биі және эстрадалық би ансамбльдері, классикалық және эстрадалық вокал бөлімінің әнші-солистері өнер көрсетіп, көрерменге эстетикалық ләззат сыйлады.
Қайрат ӘБІЛДА,
«Егемен Қазақстан»
Қарағанды облысы