Соңғы кезде Қазақстан мен Өзбекстан арасында экономикалық қарым-қатынас ерекше жанданды. Елбасы Н.Назарбаевтың 2018 жылды «Өзбекстанның Қазақстандағы жылы» деп жариялауы да бауырлас екі елдің арасындағы алыс-берістің екінші тынысын ашты. Осы жиынға арнайы қатысқан Қазақстан кәсіпкерлерінің құқықтарын қорғау жөніндегі уәкіл Болат Палымбетовтың айтуынша, бүгінде өзбек жерінде жұмыс істеп жатқан 350-дей қазақстандық компанияның 150-і соңғы реформа басталған бір жылдың ішінде құрылған екен.
– Бүгінде 2,5 мыңдай өзбекстандық компания Қазақстанда қызмет етеді. Енді міне, өзбек жерінде де қазақстандық кәсіпкерлердің емін-еркін жұмыс істеуіне бар жағдай жасалып жатыр екен. Өзбекстан Президенті жанындағы өкілдің әңгімесін тыңдап, шетелдік кәсіпкерлерге берілетін жеңілдіктер туралы естіп таңғалып отырмын. Келер жылы көрші елде Қазақстан жылы жарияланбақ. Бұл шаралар екі елдің экономикалық қарым-қатынасын одан әрі дамытады деп ойлаймын, – деді Болат Палымбетов.
Өзбекстан тарапы жариялаған деректерге қарағанда, екі ел арасындағы тауар айналымы 2018 жылдың қаңтар-мамыр аралығында 1 млрд АҚШ долларынан асқан. Бұл осыдан бір жыл бұрынғы көрсеткіштен 1,5 есе артық екен. Өзбекстан жағы өз елінің инвестициялық тартымдылығын көтеру үшін тың реформа бастаған. Өзбекстан Президентінің ұсынысымен 2017 жылы Президент жанынан кәсіпкерлердің құқықтары мен заңды мүдделерін қорғаушы өкіл инс-
титуты құрылды. Кәсіпкерлікке қатысты бұрынғы шектеулердің көбі жойылған. Мәселен, бұл елге 1-3 млн АҚШ доллары көлемінде инвестиция салатын шетелдік компания үш жылға дейін барлық табыс, кеден салығынан босатылады. Инвестиция көлемі артқан сайын салық жеңілдіктері де ұзара береді. Өзбекстан 2025 жылға қарай әлемнің ең дамыған 30 елінің қатарына енуді мақсат етіпті.
– Қазақстан Президенті Нұрсұлтан Әбішұлының «Қазіргі заманда ешбір ел, ешбір мемлекет томаға-тұйық өмір сүріп, өздігінен дами алмайды» деген қанатты сөзі бар. Әсіресе Орталық Азиядағы көршілес мемлекеттердің интеграциясы әлемді алаңдатқан экономикалық дағдарыстан оңай шығуға әсер етеді. Өңірдегі ең ірі, іргетасы қалыптасқан екі мемлекет бүкіл аймақтың өндірісін алға сүйрейді. Өзбекстан қазір ерекше өзгеріс, серпінді даму қарсаңында. Елде 16 еркін экономикалық аймақ құрылды. Кәсіпкерліктің дамуына барлық жағдай жасалған. Сондықтан қазақстандық кәсіпкерлерді біздің елге шақырамыз, – дейді Өзбекстан өкілі Миршод Насруллаев.
Осы жиынға қатысқан отандық бизнес өкілдері Өзбекстанға барған қазақ бизнесменінің алғашқы қадамын неден, қай жерден бастауы керектігі, алаяқтық, басқа да заңсыздықтар кездескен жағдайда шетелдік кәсіпкердің қорғалуы, салық жеңілдіктерінің нақты мысалдары жайлы сауалдар қойып, оған толық жауап алды. Екі ел ара-
сында қызмет етуші кәсіпкерлерге арналған интернет портал құру жайы да талқыланды. Қазір қалыптасқан жылы қарым-қатынас, іскерлік байланыстарды одан әрі дамыту туралы ұсыныстар айтылды.
– Өзбекстан – бұрынғы Өзбекстан емес, 360 градусқа өзгерді. Бізде еңбек етіп, жақсы табыс табуға барлық жағдай жасалған. Тіпті Өзбекстанда шетелдік кәсіпорын ретінде тіркеліп, басқа шетелге импорт шығарушы компанияларға да мемлекеттің үлкен қолдауы бар. Келіңіздер, көріңіздер! – дейді Өзбекстан Президентінің жанындағы кәсіпкерлердің құқықтары мен заңды мүдделерін қорғаушы өкіл Дилмурод Касимов.
Қазыбек ҚҰТТЫМҰРАТҰЛЫ,
«Егемен Қазақстан»
АСТАНА