Мерекелік байқаудың басты ұйымдастырушысы Мәдениет және спорт министрлігінің Тілдерді дамыту және қоғамдық-саяси жұмыс комитеті мен Ш.Шаяхметов атындағы «Тіл-Қазына» ұлттық ғылыми-практикалық орталығы сарапшыларының айтуынша, конкурсқа ұсынылған еңбектерді елімізге белгілі журналистерден құрылған арнайы мамандар «Үздік мақала», «Үздік телебағдарлама», «Үздік радио бағдарлама», «Үздік сайт мақаласы» аталымдары бойынша сараптады. Келіп түскен 200-ге жуық материал байқау ережесіне сай іріктеліп, қазылар қорытындысы бойынша бас жүлдеге тігілген 1 миллион теңге сыйлыққа танымал публицист, шоқантанушы Жарылқап Бейсенбайұлының еңбегі лайық деп табылды. Көрнекті қаламгерге арнайы сертификатты Мәдениет және спорт министрі Арыстанбек Мұхамедиұлы табыс етті.
Сондай-ақ «Үздік мақала» аталымы бойынша I орынды «Жас Алаш» газетінің қызметкері Нұрлыбек Сафин иеленсе, II орын «Егемен Қазақстан» газетінің Шығыс Қазақстан облысы бойынша меншікті тілшісі Азамат Қасымға бұйырып, III орынды тараздық қаламгер Әзімхан Ыбырайым еншіледі.
«Үздік телебағдарлама» аталымы бойынша I орынды «Таңшолпан» бағдарламасының журналисі Серікбек Жұмабек иеленсе, II орын «Мәселе» бағдарламасының жетекшісі Нартай Аралбайұлына беріліп, III орынды «Сарыарқа» телеарнасы жаңалықтар бөлімінің шеф-редакторы Гүлбақша Ақажанова еншіледі.
«Үздік радио бағдарлама» аталымы бойынша I орынды жас журналист Ербол Алшынбай иеленсе, II орын «Хабар» радиосының жүргізушісі Әсемгүл Аманжоловаға, III орын «Шалқар» радиосының журналисі Талант Арғынғалиға бұйырды.
«Үздік сайт мақаласы» аталымы бойынша I орын «Спортпортал.кз» сайтының тілшісі Мадияр Арыстанбаевқа, II орын республикалық «Полиция.кз» журналының қызметкері Еркеғали Бейсеновке бұйырды, III орынды «БАҚ.кз» ақпарат агенттігінің тілшісі Қымбат Елтайқызы еншіледі.
Сонымен қатар «Қазақстан тарихы» және «Әдебиет» порталдарының бас редакторы Олжас Беркінбаев бастаған төрт журналист құрмет грамотасымен марапатталса, 30-дан астам журналиске министрліктің Алғыс хаты табысталды.
Бекен ҚАЙРАТҰЛЫ,
«Егемен Қазақстан»
