Қазір «BI Group» құрылыс холдингі «Арай» саябағын абаттандырып, қайта жөндеу жобасын аяқтауға жақын қалды. Толықтай қайта жасалған саябақ арайлы Астанадағы Жетісудың бір бөлшегіне ұқсас кейіпке еніп, облыстың көрікті жерін көзбен көргендей әсер беретін орталыққа айналады. Әрі саябақтың атауы да өзгеріп, ол ендігі жерде «Жетісу» демалыс саябағы деп аталады.
Аумағы 15 гектар болатын саябақты жетілдіру жобасы аясында төрт негізгі аймақты құру жоспарланып отыр. Біріншісі – тыныш, серуенге өте ыңғайлы болмақ. Бұдан әрі орталық аллея айналасында балалардың ойын алаңы мен тамақтану аймағы, одан әрі автотұрақ аймағы орналасады. Сондай-ақ саябақта ұзындығы 1,5 шақырым болатын велосипедшілерге арналған айналма және жүгіру жолдары болады.
– Саябақта арка, кіреберіс қақпа қойылуда. Бас субұрқақ пен облыстың символы бар «Апорт» алаңы – тауларға, павильондар мен киіз үйлерге апаратын төбеден тұрады. Аумағына әртүрлі жастағы балаларға арналған ойын алаңшалары кіретін Тәңір алаңы жасалады. Таңбалы тастың жазбалары бар балбал тастар мен Шарын шатқалы пайда болмақ және саябақта ашық аспан астындағы амфитеатр салынады, – дейді жоба менеджерлері.
Алаңның ортасында хош иісті шөптер, гүлдер, бұталардан тұратын Қазақстанның картасы болады. Сонымен қатар саябақта 270 ағаш отырғызылады, оның көбі жеміс ағаштары. Демек, астаналықтар осы баққа келіп Жетісу топырағында өніп-өсетін түрлі жемістердің дәмін татады. Саябақ аумағын жарықтандыру да толықтай жүзеге асады. Түнгі тыныштыққа мүлгіген демалыс орнын 380 арнайы шам сәулеге бөлеп, самаладай жарқыратпақ.
Жуырда облыс әкімі Амандық Баталов жұмыс сапарымен Астана қаласына барғанында «Арай» саябағын абаттандыру бойынша атқарылып жатқан жұмыстардың қарқынымен танысқан болатын. Бүгінгі күні саябақта орналас-
тырылатын барлық кіші сәулет нысандары құйылып, орнатылуға әзір. Қазір 15 гектар алқапқа созылған саябақ аумағының әр бұрышында жоспарланған жұмыстар қарқынды жүргізілуде. Нысандағы барлық жөндеу жұмыстар осы маусым айының соңында толық аяқталады.
– Бұл саябақ Алматы облысының елордасы Астананың 20 жылдық мерейтойына жасаған сыйы болмақ. Астанаға қыдырып барған әрбір жетісулық осы саябақта серуендеп жүріп, туған өлкесінің табиғатын көзбен көргендей болар деген ойдамыз. Осы үшін саябақтың жаңа келбетін қалыптастыру кезінде танымал сәулетшілердің ерекше дизайн үлгілері таңдалды, – дейді облыс әкімі Амандық Баталов.
Қалмаханбет МҰҚАМЕТҚАЛИ,
«Егемен Қазақстан»
Алматы облысы