5 қаңтар – Президент Нұрсұлтан Назарбаев Астана қаласының әкімі Өмірзақ Шөкеевті қабылдап, өткен 2004 жылы атқарылған жұмыстың қорытынды есебін тыңдап, оған оң баға берді.
2 ақпан – Мемлекет басшысы Нұрсұлтан Назарбаев Астана әуежайының жаңа халықаралық терминалының ашылу салтанатына қатысып, нысанның ішін аралап көрді. Жолаушылар терминалының ғимараты бес деңгейден тұрады және 6 телескопиялық сатылармен жарақталған. Барлық ұшақ түрлерін қабылдайды һәм бір мезгілде 750 жолаушыны өткізуге мүмкіндігі бар.
24 ақпан – Елбасы Н.Назарбаев «Астанабасжоспар» мемлекеттік коммуналдық кәсіпорнында болып, елордада салынатын жаңа ғимараттардың жоба-макетімен танысты шықты. Мемлекет басшысы мүгедектер мен қарттарға арналған 410 орындық интернат үйінің жоба-макетін мақұлдай отырып, «Ана мен бала орталығы» сияқты әлеуметтік нысандарды салу жөнінде тапсырма берді.
11 наурыз – Астана төрінде орналасқан «Қазақстан» спорт сарайында «Спорт – барлығымыз үшін, спорт – бейбітшілік үшін» атты республикалық фестивальдың ашылу салтанаты өтті.
22 наурыз – Есіл өзенінің сол жағалауында тағы бір еңселі ғимарат «Нұр Астана» мешіті пайдалануға берілді. Оның ашылу салтанатына Елбасы Нұрсұлтан Назарбаев қатысып, 1994 жылы Саудияға барған сапарында король Фаһд бин Әбдел Әзиз сыйлаған Қағба жабынының бір бөлігін мешітке сыйға тартты.
8 сәуір – астаналық шығармашылық жастардың «Жас бәйтерек» фестивалі басталды. Екі күнге созылған фестивальға елордадағы 10 жоғары оқу орнынан 60 талапкер қатысып, алты аталым бойынша бақ сынады.
15 сәуір – Астана қаласында бесінші рет жас таланттардың ХІV «Жас қанат» республикалық конкурсы басталды. Оған 13 үміткер қатысты.
16 сәуір – Сыртқы істер министрлігі ғимараты ашылып, салтанатты шараға Президент Н.Назарбаев қатысты. Ғимарат құрылысын шведтің «Мобитекс» компаниясы жүргізіп, 2,5 жыл ішінде пайдалануға берген еді.
24 сәуір – қалада салынып жатқан бірқатар нысандар мен мекемелерді аралаған Мемлекет басшысы Нұрсұлтан Назарбаев бірінші кезекте Есілдің сол жағалауында бой көтерген «Нұрсая» тұрғын үй кешенімен танысты.
19 мамыр – Астанада Беларусь республикасы елшілігінің ресми ашылу салтанаты болды. Салтанатты шараға қос елдің басшылары қатысты. Елшілік орналасқан ғимарат ХІХ ғасырда салынған сәулет өнерінің ескерткіші болып табылады.
10 маусым – Астана күніне орай Елбасы Нұрсұлтан Назарбаевтың «Еуразия жүрегінде» атты кітабының тұсаукесер рәсімі өтті.
10 маусым – Қажымұқан Мұңайтпасов атындағы орталық стадионда Астана күніне арналған «Астана – менің шабытым» атты мерекелік қойылым мен «Тарих керуені» атты шеру өтті.
5 шілде – Астанада өткен ШЫҰ-ға мүше мемлекет басшыларының саммитінде терроризмге, сепаратизм мен экстремизмге қарсы күрестегі ынтымақтастық тұжырымдамасы бекітілді
26 шілде – Ұлы Жеңістің 60 жылдығына орай соғыс және тылда еңбек еткен ардагерлерге көмек көрсету мақсатында ұйымдастырылған «Жеңіс» мерекелік пойызы соңғы аялдама елорда төріне келіп табан тіреді.
10 тамыз – «Мемлекеттің нақты әріптесі ретінде «үшінші сектордың» дамуы және нығаюы» деген тақырыпта Астана қаласында үкіметтік емес ұйымдардың аймақтық форумы басталды.
30 қыркүйек – елорда төрінде еліміздегі бірлескен жоғары оқу орындарының бірі – Қазақстан-Ресей университетінің жаңа оқу ғимараты пайдалануға берілді.
1 қараша – Астанадағы «Алатау» спорт сарайында «Индустриялық-инновациялық Қазақстан» стратегиясын жүзеге асырудың алғашқы кезеңінің аяқталуына байланысты көрме ашылды.
1 желтоқсан – Елбасы Н.Назарбаев Түркияның «Риксос» отельдер жүйесі мен Ресейдің «Коалко» компаниясы және еліміздің басқа да фирмаларының қаржыландыруымен Астанада салынғалы отырған ең үлкен ойын-сауық орталығының алғашқы іртетасын қалау рәсіміне қатысты.
14 желтоқсан – Астанада өткен агроөнеркәсіп мәселелері жиынында Ауыл жылдары қорытындыланды. Оның жетістіктерін аймақтардан келген өкілдер жоғары бағалады.
Дайындаған Бекен ҚАЙРАТҰЛЫ,
«Егемен Қазақстан»