Осы орайда №9 мектеп-гимназиясының 10-сынып оқушылары Бауыржан Кабдуллин мен Әділ Шабденов Қазақстанның Франциядағы Төтенше және өкілетті елшісі Жан Ғалиевтің қатысуымен наурыз айының 28-жұлдызында Париж қаласында өткен халықаралық «Art-Baiterek Paris» конкурс-фестиваліне қатысып, өз өнерлерін көрсетті. Жас дарындар «Бие сүтінен жасалған шипалы балмұздақ» (Жетекшісі: Абдрахманова А.А.) атты жобасын таныстырып, «Балсаумал» атты балмұздағынан Франция жұртшылығына дәм татқызды. Бұл жобаға еліміздің мәдениет қайраткері, әнші Тамара Асар, елшілік қызметкерлері, халықаралық блогерлер, журналистер, «Фудмастер» балмұздақ компаниясының өкілдері қызығушылық танытты. Жас дарындарымыздың алдағы жоспарларына түрткі болатындай ұсыныстар айтылды.
Фестиваль аясында халықаралық «Союз талантов» шығармашылық орталығының ұйымдастыруымен ХХVII халықаралық «Париж, мен сені сүйемін!» шығармашылық конкурсына мектебіміздің 11-сынып оқушысы Ақмарал Бақытбек (Жетекшісі: Бекетай Б.А.) «Мәнерлеп оқу» номинациясы бойынша өнер көрсетіп, жүлделі І орынға ие болды. Қазылар алқасы шешімімен, Ақмаралға Петербургте өтетін маусымдық конкурсқа қатысуға жолдама берілді. Осы ретте шәкірттердің жетістікке жетуіне мүмкіндік туғызған мектеп директоры Б.Кушековаға, ата-аналар Бақытбек Ақсоли, Саржан Шабденов, Шортанбай Калмағанбетовке алғысымызды білдіреміз. Тәуелсіз елде билік тұтқасын ұстап, қуатты ел азаматтарына айналатын жастарға ата-аналардың инвестиция құюы стратегиялық тұрғыдан ұтымды шешім деп ойлаймыз. Өйткені олардың бүкіл өмірі алда және болашағы зор. Жастарға жүктелетін міндет те салмақты. Олар тамаша білім алып, өмір сүру деңгейін арттыруға, экономиканы дамытып, азаматтық қоғамды қалыптастыруға, зияткерлік ұлт тәрбиелеу және басқа да көптеген пайдалы әрі жағымды нәрселермен айналысуға талпынады. Бұл жетістіктер мектеп үшін ауқымы кең, тарихы терең және болашағы зор мүмкіндіктер. Сондықтан да осындай биік жетістікке жеткен дархан даланың дарынды шәкірттері көбейе бергей.
Баян БЕКЕТАЙ,
№9 мектеп-гимназиясы
директорының бейінді оқыту жөніндегі орынбасары
Ақмола облысы,
Бурабай ауданы