10 қаңтар – Астана вокзалы аумағында көлік қоюға арналған 251 орындық тұрақ ақылы режімге көшті. Нәтижесінде, вокзал маңында көлік жүктемесі 25 процентке азайды.
25 қаңтар – дүниежүзілік Қысқы Универсиада алауы елордадан бастау алды. Назарбаев Университетінде өткен рәсімге Елбасы Н.Назарбаев қатысып, еліміз туын биатлоншы Дәулет Рахымбаевқа табыстады.
16 ақпан – ЭКСПО-2017 халықаралық көрмесінің кәдесый өнімдері таныстырылды.
25 ақпан – Есіл өзенінің үстіне тұрғызылған «Қыс өрнегі» атты спорт қалашығында бұқаралық фестиваль өтіп, оған 3 мыңға жуық адам қатысты.
21 наурыз – елордадағы «Сарыарқа» велотрек сарайында «Наурыз – жаңа белес, жаңа өрлеу» атты мереке ұйымдастырылып, оған Елбасы Н.Назарбаев қатысты.
4 сәуір – қала әкімдігіне қарасты мекемелер «Бір терезе» тәсілімен қызмет көрсетуге көшті.
12 сәуір – Мемлекет басшысы Н.Назарбаевтың «Болашаққа бағдар: рухани жаңғыру» атты мақаласы «Егемен Қазақстан» газетіне шықты.
28 сәуір – ЭКСПО-2017 көрмесінің миллионыншы билетін Шымкент тұрғыны Қайрат Мамаев сатып алды.
2 мамыр – қала әкімдігі жанындағы «Zhebe» және «ЭКО такси» брендімен қызмет көрсететін компаниялар AstanaTaxi инвестициялық жобасы аясында жаңа көліктерге ие болды.
10 мамыр – «Мәңгілік ел» салтанат қақпасының ұшар биігінде қаланы шолу алаңы мен одан сәл төменіректе көрме галереясы ашылды.
19 мамыр – қазақстандық Олимпиада чемпиондары мен жүлдегерлері елордадағы «Чемпиондар аллеясына» ағаш отырғызды.
31 мамыр – елордада «Нұрлы жол» вокзалы мен Астана халықаралық әуежайының жаңа терминалы ашылды.
9 маусым – ЭКСПО-2017 көрмесіне орай қала көшелеріне жеті миллион гүл егілді.
15 маусым – елорда символы «Бәйтерек» монументі күрделі жөндеуден өтіп, жаңадан LED экраны орнатылған өнер галереясы ашылды.
16 маусым – әйгілі «дю Солей» циркі үш ай бойы астаналықтар мен қала қонақтарына өнер көрсетті.
21 маусым – Астана халықаралық әуежайы Елбасы Н.Назарбаевтың есімімен аталатын болды.
22 шілде – Астанада «Еуразия» XIII халықаралық кинофестивалі басталды. Шараға америкалық актер, продюсер, кинорежиссер Николас Кейдж мен «Оскар» сыйлығының иегері Эдриан Броуди келді.
1 тамыз – әлемге әйгілі әнші, опера майталманы Пласидо Доминго «Астана Опера» мемлекеттік опера және балет театрында қойылған Д.Вердидің «Травиата» операсында өнер көрсетті.
25 тамыз – ЭКСПО-2017 көрмесіне келген мәскеулік Юрий Шурыгин үш миллионыншы қонақ болып тіркелді.
25 тамыз – ЭКСПО қалашығы аумағында бес жұлдызды «Хилтон» қонақүйі ашылды.
10 қыркүйек – үш ай бойы жалауы желбіреген ЭКСПО-2017 халықаралық мамандандырылған көрме өз жұмысын аяқтады. Көрмені 4 миллион адам тамашаласа, әрбір алтыншы қонақ шетелдік болды. «Нұр Әлем» ұлттық павильоны көрменің ең танымал орталығына айналды. Оған 1 млн 300 мың адам кіріп шықты.
27 қыркүйек – Астанадағы «Арай» саябағының ішінде «Қазақстан – Корея» достық бақшасы ашылды.
27 қыркүйек – Президент Н.Назарбаев Астана қаласының 20 жылдығын мерекелеу туралы өкімге қол қойды.
27 қазан – Мемлекет басшысы қазақ тілі әліпбиін кириллицадан латын графикасына көшіру туралы Жарлыққа қол қойды.
8 желтоқсан – алдағы жылы болатын бас шаһардың 20 жылдық мерейтойына орай елордаға арналған пошталық марканың таныстырылымы өтті.
Дайындаған
Бекен ҚАЙРАТҰЛЫ,
«Егемен Қазақстан»
