Ойын алдында Бельгия фаворит саналды. Себебі Англия құрамасының бапкері Гарет Саутгейттің қосалқы құрамдағы жас футболшыларды шығаратыны белгілі болды. Дэнни Роуз, Рубен Лофтус-Чик, Фабиан Делф секілді болашағы бар футболшылар бірінші минуттан бастап алаңға шықты. Есесіне, Джесси Лингард, Маркус Рэшфорд, Делле Алли секілді мықтылар демалыс алды. Матч басталысымен Насер Шадлидің керемет пасын Томас Менье голға айналдырды. Бұл гол кездесу тағдырына қатты әсер етті. Екінші таймда жағдайды өзгерткісі келген бапкер Англияның ойынын мүлде бөлек арнаға бұрды. Алаңға «Манчестер Юнайтедтің» екі оғланы шықты. Рэшфорд пен Лингард шабуылға дем беріп, британиялықтар қарсыласты қыспаққа ала бастады. Бірақ, қарымта шабуылға иек артып келген Бельгия 82-минутта екінші голды соғып, матч тағдырын түбегейлі шешіп тастады. Бельгия тұңғыш мәрте қола жүлдегер атанды. Бас бапкер Роберто Мартинес ойыннан кейін «Бұл қола медаль Бельгияның бізден кейін келетін жас футболшыларына бағындыратын белес болып тұруы тиіс» деп ағынан жарылды. Қаншама жылдар бойы талантты ұрпақ тәрбиелеп келген «қызыл сойқандар» еш нәтижеге қолдары жетпей, салы суға кетіп, ұнжырғасы төмен түсіп қайтатын. Енді міне, ұзақ күттірген медальдың сыңғыры естіліп, қоржын бұл жолы бос қайтпайтын болды.
Әлем чемпионаттарының қола жүлдесі үшін талас ешқашан голсыз болмаған. 0:0 деген есеп ешқашан тіркелмеген екен. Бұл жолғы ойында голсыз болмады. Дегенмен, ойында 2-ақ гол соғылды. 2 голды азсынып тұрғанымыздың да өз жайы бар. Бүкіл чемпионаттардың тарихындағы «кіші финалдарда» орташа есеппен 4 гол соғылған екен. Ал соңғы 10 жұбаныш кездесуінде кем дегенде 3 голдан соғылыпты.
Сонымен қатар осы әлем чемпионатының бір қызығы – стандартты жағдайлардан соғылған голдардың көп болуы. 28 пенальти белгіленіп, оның 21-і голға айналған. Әрбір орындалған 30 бұрыштаманың бірі голмен аяқталыпты. Биылғы маусымда Чемпиондар лигасында бұл көрсеткіш сәл нашарлау еді. Ол турнирде әрбір 45 бұрыштамада бір доп қақпаға еніп отырған. Сонымен қатар Англия құрамасы да бір рекордты қайталады. Жарыста 12 гол соққан ағылшындар соның 9-ын стандарттан ұйымдастырыпты. Мұндай үлкен көрсеткішті 1966 жылы Эйсебио бастаған Португалия командасы тіркеген.
21-рет ұйымдастырылған чемпионатта, сонымен бірге тағы бір тарихи факт өзгерді. Кей чемпионаттарда 4-5 команда гол соқпай қайтатын. Бұл жолы бүкіл 32 команданың да қанжығасы майланды. Майланғаны былай тұрсын, 32 команда кем дегенде 2 голдан соқты. Чемпионатқа бірінші рет келген Панаманың өзі 2 рет есеп өзгертті.
Ермұхамед МӘУЛЕН,
«Егемен Қазақстан»
