Хельсинкидегі президенттік сарайда екі мемлекеттің басшысы алдымен шағын құрамда кездесіп, пікір алмасты.
Кездесу барысында Ресей Президенті тиянақты әңгімелесудің уақыты жеткендігін атап өтті.
– Біздің байланыстарымыз жалғасып келеді. Біздер телефонмен де сөйлесіп отырдық және халықаралық іс-шаралардың аясында бірнеше рет жүздестік. Міне, екі жақты қарым-қатынастар мен әлемдегі «жанды нүктелер» жайында ашылып сөйлесетін уақыт жетті және қордаланып қалған мәселе көп, – деді В.Путин.
Ал Д.Трамп өз сөзінде күллі әлем Мәскеу мен Вашингтонның арасындағы қарым-қатынастардың жақсаруын күтіп отырғандығына тоқталды.
– Біздің елдеріміздің екіжақты байланыстарды қалпына келтіруге үлкен мүмкіндігі бар. Ол бірнеше жылдарға созылып келеді, – деді Д.Трамп.
АҚШ президенті, сондай-ақ өз сөзінде Америка тарапын сауда, әскери мәселелер, екі мемлекеттің ядролық әлеуеті және Қытайға байланысты келіссөздер қызықтыратындығын атап өтті. Ол, сонымен қатар Путинді Ресейдің футболдан әлем чемпионатын сәтті өткізуімен құттықтауды ұмытпады.
Бұл шағын құрамдағы кездесулердің бұқара үшін ашық тұсы екі мемлекет басшыларының қол алысуымен түйінделді. Бұдан соң Путин мен Трамп келіссөздерін оңаша жалғастырды.
Сонымен қатар кеңейтілген құрамдағы келіссөздер де өтті.
Атап өтерлігі, Хельсинки саммиті көпжақты халықаралық форумдарды айтпағанда, әлемдегі екі жетекші мемлекет басшыларының толық кездесуіне мүмкіндік берген алғашқы жиын болды.
Серік ӘБДІБЕК,
«Егемен Қазақстан»