«Еліміз бойынша шомылуға арналған қалалық және жекеменшік жағажайлар анықталған. Бұл жерлерде ТЖК бөлімшелерінде арнайы даярлықтан өткен қоғамдық құтқарушылар есебінен объектілік құтқару бекеттері құрылған. Су айдындарының қауіпті және күзетілмейтін учаскелерінде құтқарушылар ТЖК мобильді құтқару бекеттерін ұйымдастырды. ТЖД әкімдіктермен бірлесіп шомылуға тыйым салынған жерлерді белгіледі. Бұл жерлерге 3 мыңнан астам тыйым салу және ескерту белгілері орнатылды. Алғаш рет биыл еліміз бойынша профилактикалық жұмыс жүргізу үшін еріктілер ұйымдары тартылды. «Жас Отан» жастар қанатымен бірге тиісті жоспар-кесте бекітілді. Атап айтқанда, барлығы 2 мыңнан астам волонтер тартылды. Олар 330 акция өткізуге, 200 бейнематериал әзірлеуге қатысты, 123 мың үгіт өнімі таратылды. Халық арасында 300 мыңнан астам үгіт өнімдері парақшалар, жадынамалар, брошюралар үлестірілді. Мәселен, ағымдағы жылғы сәуірден 16 шілдеге дейін 5 мыңнан астам рейд жүргізілді», деді ол.
Сонымен бірге қабылданып жатқан шараларға қарамастан, шомылуға арналмаған су айдындарында адамдардың қаза болу фактілері тіркелгені туралы ақпарат берілді. Бұл ретте суға батқандардың 85 пайызы шомылу маусымының басында тіркелген.
«Еліміздің су айдындарындағы оқыс жағдайлардың негізгі себептеріне тоқталып өтелік. Бірінші, өз күштерін толық бағаламау, қатты ағыс, аяқ-қолдарының құрысуы, балық аулау кезіндегі ережелерді сақтамау, су айдындарының маңында қараусыз қалған балалардың суға түсіп кетуі, жүзе білмеу, мас күйінде шомылу, жүзу құралдарымен серуендеген кезде суға кету жиі кездеседі», деді ол.
Вице-министр ел азаматтарын су айдындарындағы қауіпсіздік қағидаларының талаптарын сақтауға шақырады.
«Бірінші кезекте тыйым салынған және жабдықталмаған орындарда шомылмауға, масаң күйінде суға түспеуге, қайықтардан, катерлерден, айлақтардан, сондай-ақ бейімделмеген құрылыстардан суға секірмеуге, жүзу шегін білдіретін қалтқы белгілерден аспауға, жүзуге арналмаған заттарды пайдаланып жүзбеуге, техникалық және ескертетін белгілерге, қалтқыларға мінбеуге, балаларға ересектердің қарауынсыз суға түспеуге кеңес береміз», деді Ішкі істер министрінің орынбасары.
Рауан ҚАЙДАР,
«Егемен Қазақстан»
