Тәрбие • 30 Шілде, 2018

Туған жер жайлы толғаныс

641 рет
көрсетілді
3 мин
оқу үшін

Бейнелеу өнер мұражайында қойылған Қазақстанның еңбек сіңірген әртісі, кино және театр актеры Асылболат Смағұловтың «Туған жер» атты жеке көрмесін қызы­қ­тау­шы­лар қатары қалың болды. «Рухани жаңғыру» бағдар­ла­масы шеңберінде ұйымдастырылған шараға облыс әкімінің бі­рін­ші орынбасары Айдарбек Сапаров, Мемлекеттік қызмет сала­сындағы өңірлік хаб басқарушы комитетінің төрағасы Әлихан Бәйменов қатысты.

Туған жер жайлы толғаныс

А.Смағұлов Құрманғазы атын­дағы консерваторияны бі­­тіріп, драма актері маман­ды­ғын алып шықаннан кейін ең­бек жолын Торғай облысында бас­тап, кейін Астанадағы Қ.Қуаныш­баев атындағы драма театрында жалғастырған. «Қыз Жібек» спектаклінде Беке­жан рөлін сомдағаны үшін Қазақстанның еңбек сіңірген әртісі ата­ғына ие болған. Тбилисиде өткен халықаралық жастар те­атр­лары фестивалінің дипло­ман­ты атанған.

Орта Азия мен Қазақстан театрларының ха­лық­аралық байқауының Гран-приін жеңіп алған. «Ап­иын», «Ұмытпа мені», «Кө­ш­­­пенділер», «Біржан сал», «Елім-ай» «Қазақ хандығы» фи­льм­де­рінде басты және қосалқы рөл­­дерді бейнелеген. Белгілі те­атр сыншысы Әшірбек Сығай «Мұз­балақ қарақшы, қаражүрек кәз­зап Бекежанды сәл-пәл сүй­кімділікке сүйрелеген, оның сұс­ты жүзіне аз-кем қан жү­гір­ткен алаш актері Асыл­бо­лат Смағұлов болды» десе, Қазақ­станның халық жа­зу­шы­сы Сәкен Жүнісов «Қыз Жібек­те­гі» «Асылболат-Бекежан» – қазақ театры сахнасындағы үлкен құбылыс» екенін атап көрсеткен.

Көрменің ашылу рәсімінде Айдарбек Сейпілұлы кәсіби актерге облыс әкімінің құрмет гра­мотасын салтанатты түрде та­быс етіп, шығармашылық жо­лының табысты жалғаса беруіне ті­лектестік білдірді. Жан досы Ә.Бәйменов «сегіз қыр­лы, бір сырлы» тұлғаның ақын­дық, сазгерлік, әншілік, мү­­сін­шілік, суретшілік қа­бі­лет­­тері жайлы кеңінен әңгі­ме­леп берді.

Қылқалам құдіреті арқылы су­рет­шілік талантын таныта­ біл­ген жерлесіміз көрмеге 40-тан астам кескіндеме және гра­­фика жұмыстарын ұсынды. Түр­­лі жанрдағы суреттер, жан­рлық композициялар, портреттер, пейзаждар да өзіндік орын­да­лу­ы­мен ерекшеленеді.

– Бала кезімнен сурет салуға өте әуес болдым. Қабырғаларға Вас­нецовтың «Үш батырын», бас­қа суреттерді салып қоя­тын­мын. Жас ұлғая келе шын­дап айналыса баста­дым. Су­реттерім – жан дүниемнің айнасы іспет­тес. Қай-қайсысында болсын туған жерге деген балалық са­ғы­нышым мен перзенттік тол­­ғанысымды сурет тілінде «сөй­­летуге» ұмтылдым, – дейді Асыл­болат Смағұлов.

Шынында да «Уақыт», «Ана», «Шырмауық, жалған дү­­ние», «Асау күрең», «Қалың­дық» тағы басқа картиналардың кә­­сі­би суретшінің туындыларынан еш айырмасы жоқ. Қорқыт, Ақан сері, Баян Сұлу, Қыз Жі­бек, Бекежан портреттері де өзін­дік даралығымен сипатталады.

Ол бейнелеу өнері мұра­жай­ына бірнеше туындысын сыйға тартты.

 Өмір ЕСҚАЛИ,

«Егемен Қазақстан»

Солтүстік Қазақстан облысы