Қазақ музыка өнерінің абыройын асқақтатып, оның бекзат болмысын бүкіл әлемге танытқан Жәния Әубәкірованы Шет ауданының азаматтары сән-салтанатпен қарсы алып, ерекше сый-құрмет көрсетті. Туған жерге сапарының алғашқы қадамын әйгілі пианист ата-бабасы мәңгілік тыныс тапқан мекенге барып, олардың рухына тағзым етуден бастады. Одан кейін атасы жаз жайлаған «Әубәкір бұлағы» деген жайлауға ат басын тежеп, тұмса табиғат аясында, ағайын-туыс пен ауылдастарының құрметіне бөленді. Тұма бұлақтан су ішіп, ауыл ақсақалдарының ата-бабаның өмірдастаны, туған жер тарихы жайында айтқан әсерлі әңгімелеріне құлақ салды.
Шет ауданының орталығы Ақсу-Аюлы кентінде Жәния Яхияқызын еңбектеген баладан еңкейген қарияға дейін тағатсыздана күтіп тұрған еді. Бұлай болатын да жөні бар. Қолға түсе бермейтін қонақ бұл өңірге, ата-бабасының мекеніне бала күнінде бір келгені болмаса, былайғы кезде ат ізін салмаған екен. Кенттегі мәдениет үйінде өткен кездесу барысында аудандық мәслихаттың шешімімен Жәния Әубәкіроваға «Шет ауданының құрметті азаматы» атағы салтанатты түрде табыс етілді. Мұндай сый-құрметке ерекше тәнті болған қазақтың талантты қызы жерлестеріне басын иіп алғыс айтты. Сахнаның төрінде тұрған фортепьяноға барып, өзінің ризашылығын музыка тілімен төгілдірте жеткізді.
Кездесу барысында Жәния Яхияқызы жерлестерінің сұрақтарына егжей-тегжейлі жауап беріп, өзінің болашаққа деген жоспарларымен бөлісті. Кеш соңында ел ағаларының бірі, Шет ауданының қадірменді ақсақалы Боранбай Жұмкин: «Жәния Әубәкірова – бір атаның, болмаса бір ауданның ғана қызы емес, ол – барша қазақтың алақанға салған аяулы қызы» дей келіп, құшағы гүлге толып, жан сарайы ықыластың нұрына шомған кеш иесіне ақ батасын берді.
Өнер иесінің туған жерге тәу етіп келген сапарын оның құрметіне жайылған ақ дастарқан түйіндеді. Ақ тілек ақтарылып, ыстық ықылас нұр болып құйылған кеште жерлестері Жәниядай қазақтың аяулы қызына бәйгенің алдын бермей жүрген жүйрік ат мінгізді. Бір сөзбен айтқанда, елдің атын шығарған алтын қызға деген ағайынның құрметі ерен болды.
Кеш соңында Жәния Әубәкірова осы игі шараны ұйымдастыруға мұрындық болған қадірменді ақсақал Боранбай Жұмкинге, осы өңірдің тумасы, Мәжіліс депутаты Нұрлан Дулатбековке, белгілі қаламгер Сәулебек Жәмкеновке, Шет ауданының әкімі Марат Жандәулетовке, аудандық мәслихат депутаттарына, Алтыбай Ыбыраев пен Құрманғазы Әміров бастаған барша жерлестеріне жүрекжарды алғысын жеткізді. Әлемнің әйдік сахналарында тұрып сый-құрмет пен қошеметтің жеті атасын көрген әйгілі музыкант мұның барлығының жерлестері жайған құшақ пен пәк пейілінің жанында түкке де тұрмайтынын тебірене айтты.
Қайрат ӘБІЛДА,
«Егемен Қазақстан»
Қарағанды облысы,
Шет ауданы