Саналы ғұмырын Сарытоғай ауылында шағын ғана мәдениет үйінің меңгерушісі болып атқарған Көшерғали Макаров Қазақстанның батыс өңіріндегі жыршылық мектебін жаңғыртуға үлес қосқан үлкен өнерпаз еді. Табиғи талантының арқасында алақандай ауылдан шыққан өнерпаздың есімі Қазақстаннан тыс жерлерге де жетті. 1980 жылы Мұхит Мерәліұлының 140 жылдығына арналған әншілер байқауының, 1988 жылы Алматы қаласындағы республикалық жыршы-термешілер байқауының жеңімпазы болған Көшерғали жырау 1988 жылы Баку қаласындағы дүниежүзілік жыршылар байқауының, 1989 жылы Түркі халықтары дастаншыларының халықаралық өнер фестивалінің лауреаты атанған еді. 2001 жылы Қызылорда қаласындағы «Ғасырлар үні» жыршылардың «Жиенбай жырау» атындағы байқауының жүлдегері, 2005 жылы Маңғыстау қаласындағы «Шотан батыр» жыршылар байқауының лауреаты болды. 2005 жылы Мәдениет, ақпарат және спорт министрлігі мен Мәдениет пен өнерді қолдаудың мемлекеттік қорының «Мәдениет қайраткері» құрмет белгісімен марапатталды.
1997 жылы оңтайландыру тұсында Тайпақ ауданы тарап, жаңадан пайда болған Ақжайық ауданының орталығы Чапаев селосын «қазақыландыруға» келген топтың ішінде осы Көшерғали ағамыз да болды. Чапаевта жыраулар мектебін ашып, талай бәйгеде топ жарған шәкірт те тәрбиелеп үлгерді. Танымал жыршы 2017 жылы 66 жасында өмірден өткен еді.
Ауылдасын еске алуға сарытоғайлықтар жақсы әзірленіпті. Кеште Көшерғали Макаровтың шәкірттері Сұңғат Жанаев, Гүлжамал Қайбалиева, Данияр Елеуов, Сатыбалды Сүйенұлы, Қайрат Шабданұлы және басқалары ауыл сахнасынан әуезді ән, төкпе жыр шырқап, көрерменді тәнті етті. Жыршының бірге өскен жолдасы Орынбасар Жәңгіров, құрдасы, Қазақстан Журналистер одағының мүшесі Тілес Жазықбай, Сарытоғай ауылдық округінің әкімі Абзал Жәрдемұлы, көршілес Атырау облысы, Индер ауданы Мәдениет үйінің ән-терме үйірмесінің жетекшісі Еркін Әубәкіров, Сарытоғай Мәдениет үйінің директоры Ардақ Шабданқызы, Сарман ауылының тұрғыны, зейнеткер Амангелді Қалиталиев, жезтаңдай жырау Қайрат Биманов, көршілес Базаршолан ауылдық округінің әкімі Ерлан Базарбайұлы, аудандық мәслихат депутаты Қанапия Таспай және басқалары жыршы туралы естеліктерін ортаға салды.
Осы кеште Тілес Жазықбай Көшерғали Макаровтың өзі көп жыл қызмет еткен Сарытоғай Мәдениет үйіне жыраудың есімін беруді ұсынып, оны барлығы бірауыздан қолдады.
Кештің мәнді де мағыналы өтуіне белгілі ақын Сағынтай Бисенғалиев, аудандық мәдени-демалыс орталығының директоры Ерлан Хабибуллин ерекше үлес қосты. Кеш соңында жыраудың жары Жұмазия, ұлы Алтынбек жиналған жұртқа ыстық ілтипаты үшін алғыс айтты.
Қазбек ҚҰТТЫМҰРАТҰЛЫ,
«Егемен Қазақстан»
Батыс Қазақстан облысы