6 жасқа толмағандар да мектепке барады
Оқу жылының 1 қыркүйектен басталатынына қарамастан, баланы мектепке беру шараларын алдын-ала ойластырған жөн. Биылдан бастап еліміздегі жалпы білім беретін ұйымдардың ұйғарымы бойынша бірінші сыныпқа жеті жасқа толған балалар және ағымдағы күнтізбелік жылы алты жасқа толатын балалар да қабылданатын болады. Яғни қыркүйек-желтоқсан айларында туған балалар бірінші сыныпқа бара алады. Себебі күнтізбелік жылдың соңына дейін олар толық алты жасқа толады және мектепке қабылдануға құқығы бар. Сондай-ақ типтік ережелерге сәйкес, білім алушылардың даярлық деңгейі және даму дәрежесі бойынша сыныптарды толықтыруға жол берілмейді, бір сыныптағы оқушылар саны 25-тен аспауы тиіс.
Директорлар ортақ келісіммен тағайындалады
Ағымдағы жылы еліміздегі мектептерді аккредиттеу және мектеп директорларын тағайындау мәселесінде бірқатар өзгеріс болмақ. Вице-министр Асхат Аймағамбетовтің айтуынша, ендігі уақытта білім басқармалары мен бөлімдері мектеп директорларын дербес тағайындай алмайды. Бұдан былай олар «Дарын» орталығымен ортақ келісімге келуге міндетті.
Ағылшын тілінде сабақ беріле бастайды
Жаңа оқу жылында кейбір мектептер 10 және 11 сыныптар үшін бірнеше пәнді ағылшын тілінде оқытпақ. Министрліктің жоспарына сүйенсек, таяу уақытта қазақстандықтар пәндердің 80%-ін ағылшын тілінде оқып үйренуі керек. Бүгінгі таңда оларға дәріс беру үшін ағылшын тілін В2 деңгейінде білетін 7 мың педагог дайын. Аталған мұғалімдер химия, физика, биология, информатика пәндерін ағылшын тілінде оқытады. Сондықтан 2018-2019 оқу жылында жалпы білім беретін 2 мың мектеп немесе мектептер санының 41 проценті төрт пәнді ағылшын тілінде оқытуды бастайды. Алайда бұл екі мың мектеп қыркүйектен бастап ағылшын тілінде оқытуға толық көшеді деген сөз емес. Министрліктің айтуынша, мұнда арнайы әдістеме мен технология бар. Келесі жылы 12 мың педагог ағылшын тілінде сабақ беруге дайын болады деп күтілуде.
Жаңа пәндер енгізіледі
Сондай-ақ келесі 2019-2020 оқу жылынан бастап еліміздің барлық орта мектептерінде «Кәсіпкерлік негіздері» пәні 10-11 сынып оқушыларына аптасына екі рет оқытылады. Биылғы оқу жылынан бастап осы пән бойынша бағдарлама және оқулық апробациядан өтпек. Апробация еліміздің барлық 17 өңірінде жүргізіліп, мектеп мұғалімдері тиісті курстарды аяқтады. Министрлік аталған пән оқулығының бірінші нұсқасы дайын екендігін жеткізді.
Ағымдағы жылдың қазан айынан бастап мектептерге жаңадан «Өлкетану» пәні енгізіледі. Интеграцияланған оқулықты 5-6-7 сынып оқушылары қазақ және орыс тілдерінде оқитын болады. Кітаптың мазмұны Білім және ғылым министрлігі мен өңірлерде құрылған арнайы сараптамалық комиссияның тексерісінен өтіп мақұлданған. Құрастырушы 8 автор жиырма сағаттық бағдарламада бала өз бетінше ізденуге бейімделетіндігін айтады. Министрлік тапсырысы бойынша дайындалған оқулық Елбасының «Рухани жаңғыру» бағдарламасын негізге алған. Кітапқа тарих, қазақ әдебиеті, география, музыка сияқты 4 пән кіріп отыр.
Электронды жүйе жұмысты жеңілдетеді
Жаңа оқу жылы қарсаңында барлық мектептің оқулықтармен 100 процент қамтылуы, оның ішінде жаңартылған білім беру мазмұны бар оқулықтар санының жеткілікті болуы министрлік тарапынан қатаң қадағалануда. Сонымен қатар жаңа оқу жылынан бастап мектептегі қағазбастылық мәселесін де қысқарту қолға алынбақ. Электронды күнделік пен электронды журналдар, ата-аналармен байланыс орнату үшін арнайы даярланған ұялы қосымшасы қағазбастылықты біршама азайтпақ. 1 сыныпқа электронды қабылдау жүйесі де ұстаздардың жұмысын жеңілдетеді.
Ұстаздар қауымы үшін тағы бір жаңалық – биыл білім берудің жаңа бағдарламасына сәйкес, аттестациядан жалпы білім беретін орта мектептердің мұғалімдері ғана өтсе, енді қараша айынан бастап психологтар да өтетінін айта кеткеніміз жөн.
3 млн балаға көмек көрсетілді
Биыл он бірінші рет ұйымдастырылған «Мектепке жол» акциясы 1 тамыздан 30 қыркүйекке дейін жалғасады. Министрліктің Балалардың құқығын қорғау комитетінің төрағасы Нұрбек Оршыбековтың мәлімдеуінше, осы уақыт аралығында акция бойынша 3 миллионға жуық балаға 17 миллиард теңгеден астам материалдық көмек көрсетілді. «Өткен жылы аталған көмекке қол жеткізген бала саны 316 мың оқушыны құрап, қайырымдылық көмектің сомасы 3 миллиард теңгеге жеткен. Бүгінде көмекке мұқтаж балалардың саны шамамен 323 мың бала, бұл тізім әлі де толығады», деді Балалардың құқықтарын қорғау комитетінің төрағасы.
Мирас АСАН,
«Егемен Қазақстан»
