Мемлекет басшысы жұртшылық алдында сөйлеген сөзінде барша қазақстандықты Құрбан айт мерекесімен құттықтап, бұл мейрамның бейбітшілік пен адал ниетке негізделген символдық мәнінің зор екенін және исламның мызғымас рухани құндылықтарын айқындайтынын, сондай-ақ мейірімділік пен ізгіліктің, жақсылықтың жаршысы болып саналатынын атап өтті.
«Бүкіл мұсылмандар, халқымыз намазын оқып, парызын орындау мақсатында менің Жарлығыммен бұл күн мейрам деп жарияланған. Халқымыз осы күнді ерекше атап өтіп, намаз оқып, құлшылық жасап, Алладан тілек тілеген. Бұл ‒ Алланың көрсеткен жолы, Пайғамбардың ізі. Қазақстанның барша мұсылман қауымын осы мерекемен құттықтаймын! Сіздердің барлық дұға-тілектеріңізді Алла қабыл етсін!» деді Н.Назарбаев.
Қазақстан Президенті Құрбан айттың мән-маңызы тек намаз оқумен және құрбандық шалумен шектелмейтінін айтты, сондай-ақ жағдайы жоқ отбасыларға, жетімдерге, қарттар мен барлық мұқтаж жандарға қайырымдылық танытып, көмек көрсетуге шақырды.
«Бұл мереке елдің бірлігі мен болашағын нығайтып, иман, қанағат, қайырымдылық мағынасын білдіреді. Осы күндері ағайын-туысқан қауышып, бір-бірінің үйінде дәм татып, кемтарларға көмектесіп, жақсылық жасайды. Қазіргі таңда еліміздің азаматтары «Рухани жаңғыру» бағдарламасымен өзінің туған жеріне, ауылына жақсылық жасап, аурухана, балабақша, мектеп салып беріп жатыр. Мұндай қайырымдылық та сауапты болады деп есептейміз. Осындай игі істерді жалғастыра беру керек», деді Елбасы.
Мемлекет басшысы бүгінде Қазақстанда діндердің өркендеуі үшін және олардың конфессиялық ұстанымдарына қарамастан, діни ғұрыптарының орындалуына барлық жағдай жасалып отырғанын айтты.
«Жуырда Астанада жаһандық және конфессияаралық диалог пен қарым-қатынастардың одан әрі дамуына серпін беретін Әлемдік және дәстүрлі діндер көшбасшыларының VI съезі өтеді», деді Н.Назарбаев.
Қазақстан Президенті Құрбан айттың терең мән-мазмұны қонақжайлылықты, достық пен бірлікті қастерлейтін халқымыздың рухани құндылықтарымен және мәдениетімен үндесетінін атап өтті.
«Баршаңызға зор денсаулық, әрбір отбасына бақ-береке тілеймін! Қазақстанымыз өркендеп, елімізде әрдайым достық, тыныштық пен тұрақтылық салтанат құра берсін!» деді Мемлекет басшысы.
Соңында Нұрсұлтан Назарбаев отандастарымызды Құрбан айтпен тағы да құттықтап, Қазақстан халқына бақ-береке тіледі.
Абай АСАНКЕЛДІҰЛЫ,
«Егемен Қазақстан»