«Нұр Отан» партиясы Төрағасының бірінші орынбасары Мәулен Әшімбаев жастар форумының үшінші маусым қатысушыларымен арнайы кездесіп, олардың алдағы өмірлеріне сәттілік тіледі, сондай-ақ қазіргі әлемдік геосаяси ахуалға назар аударып, осы жолдағы жастардың рөліне тоқталды.
– Елбасының саяси және рухани жаңғыру реформаларын жүзеге асыруды белсенді жалғастыруымыз қажет. Себебі Мемлекет басшысы жариялаған жүйелі жаңғыру бағдарламаларының негізгі мақсаты – ұлттық құндылықтарымызды дәріптеп, әлемдік тәжірибелерден үйрене отырып елдігімізді нығайту. Сондықтан бұл жұмыстарға мемлекеттік органдардан бөлек, қоғамдық бірлестіктер, саяси партиялар, үкіметтік емес ұйымдар және жастар белсене қатысуы керек, – деді Мәулен Әшімбаев.
Партия Төрағасының бірінші орынбасары бұл бағытта «Нұр Отанның» қолға алған жұмыстарына көңіл бөліп, жастарға жаңа партиялық жобалар жайында жан-жақты сөз етті. Оның айтуынша, 20-дан астам жаңа партиялық жоба қолға алынып, тиісті жұмыстар басталған.
Өз сөзінде спикер партияның «Цифрлы Қазақстан», «Рухани жаңғыру» бағдарламаларын жүзеге асыруға үлес қосуға, халықтың цифрлы сауаттылығын арттыруға және кәсіпкерлікті қолдауға бағытталған бірқатар нақты жобаларды қолға алғанына ерекше тоқталды. Атап айтқанда, партия алдағы үш жылда тегін 1000 ІТ-сынып ашуды жоспарлап отыр. Онда жылына 150 мың бала бағдарламалау, робот техникалары және 3D модельдеу негіздерін меңгеретін болады. Ал болашағын ақпараттық технология саласымен байланыстырғысы келетін азаматтар үшін «Нұр Отан» 20 ІТ-орталық ашып, білікті ІТ-мамандар даярлау ісін бастап кетті. Аталған жобаның түлектеріне тек Қазақстаннан ғана емес, әлемдік ІТ-нарығындағы тапсырыстарды орындау арқылы шетелдік компаниялардан да жұмыс табуға мүмкіндік бар. Қазірдің өзінде еліміз бойынша 100-ден астам ІТ-сынып пен 15 ІТ-орталық ашылды. Мәулен Әшімбаев бұл жұмыстар «Нұр Отан» партиясының «Цифрлы Қазақстан» бағдарламасының жүзеге асырылуына қосқан нақты үлесі екенін атап өтті.
Ауыл балаларына ағылшын тілін үйрету үшін партия «English for Jastar» жобасын жүзеге асыруда. Соның аясында алдағы уақытта шетелдік азаматтарды, «Болашақ» бағдарламасының түлектерін және ағылшын тілін еркін меңгерген жасотандықтарды, барлығы 500-ге жуық жас азаматты еліміздің әр өңіріндегі ауыл-аймаққа, соның ішінде шалғайдағы елді мекендерге жіберу жоспарланып отыр.
Бұдан басқа Қазақстанның әр түкпірінде жастар инфрақұрылымын дамытуға бағытталған жаңа партиялық жобалар да бар. Солардың қатарында отандық кітапханалардың жұмысын жаңғыртып, заманауи білім орталықтары ретінде қайта құру бастамасын ерекше атап өткен жөн. Осы мәселеге назар аударған Мәулен Әшімбаев еліміздегі кітапханалардың басым бөлігінде материалдық-техникалық база мен қызмет көрсету сапасы ескіргеніне көңіл бөлді. Сонымен қатар «Нұр Отан» партиясы «Мектеп асханаларын жаңғырту» жобасы арқылы білім беру мекемелерінде дұрыс тамақтану жүйесін енгізуді қолға алып отыр.
«Денсаулық сабағы» және «Спорт инфрақұрылымын жаңғырту» жобалары арқылы партия мектеп оқушыларының саламатты өмір салтын ұстануларына да жағдай жасауды қолға алуда. Соның нәтижесінде «Нұр Отан» бизнес қауымдастықпен бірлесіп мектептерде қазіргі заманға сай спорт алаңдарын ашып, бастауыш сынып оқушылары үшін «денсаулық сағатын» енгізбек.
Сонымен қатар Мәулен Әшімбаев қазір ақпарат заманы екенін айтып, осындай кезеңде Елбасы анықтап берген міндеттерді жүзеге асырып, мақсатқа қол жеткізу жолында жастардың бойында қандай қасиеттер болуы керектігіне тоқталды.
Кездесу соңында жастар өздерін толғандырған сауалдарын жолдап, алдағы уақытта түрлі жобаларды партиямен бірлесіп жүзеге асыру үшін тың идеяларымен бөлісті.
Байқал БАЙӘДІЛ,
«Егемен Қазақстан»
Ақмола облысы