Мемлекет басшысының Атырауға сапары «Карат» жауапкершілігі шектеулі серіктестігіне қарасты «Дәулет» жеке индустриялық аймағының жұмысымен танысудан басталды. Елбасына бұл жерде нан және макарон өнімдерін шығаратын цехпен қатар, дайын өнім үлгілері көрсетілді.
Сондай-ақ Қазақстан Президентіне Атырау облысындағы инвестициялық жобалар таныстырылды. Атап айтқанда, қуаты 52 мегаватт болатын жел электр стансасы, ыстық күйінде мырыш жалату цехы, робот арқылы дәнекерлеу әдісін қолдана отырып, металл құрылғыларын, карбон негізіндегі қуатты кабель, крекинг катализаторларын өндіру жөніндегі кәсіпорындар, фармацевтика зауыты, қысымды өлшеуге арналған құрылғылар шығаратын зауыт, құс фабрикасы, аумағы 20 гектар болатын жылыжай және басқа да жобалар бар.
Жалпы, «Дәулет» жеке индустриялық аймағы – көп салалы заманауи кәсіпорын. Оның құрамында нан және кондитерлік өнімдер өндіретін «Дәулет нан» зауыты, ауыз су дайындайтын цех, «Райхан» шаруа қожалығы, макарон өнімдерін өндіретін цех, диірмен, ет комбинаты, тігін цехы, сондай-ақ асфальт-бетон зауыты жұмыс істейді.
«Дәулет» жеке индустриялық аймағында 244 жұмыс орны ашылған. Жобаның құны – 1,51 млрд теңге. Кәсіпорын соңғы төрт жылда кемелдене түскен.
Мемлекет басшысы мұнан соң «Ембімұнайгаз» акционерлік қоғамына барып, өндірістік үдерістерді қадағалау орталығының жұмысымен танысты. Онда Елбасына цифрлы зияткерлік кен орнының жүйесі көрсетілді. Бұл нақты уақыт режімінде өнеркәсіп нысандарынан түсетін ауқымды мәліметтерді өңдеуге, шұғыл шешім қабылдау мақсатымен оған әрі қарай талдау жасауға, сондай-ақ кен орындарындағы өндіру үдерісін жақсартуға мүмкіндік береді.
Нұрсұлтан Назарбаев кен орындарына цифрландыру элементтерін енгізудің арқасында еңбек өнімділігі артып, құрылғыларды жөндеу мерзімінің және бірін бірі қайталайтын құрылымдардың қысқарғанын айтып, түпкі нәтиженің пайдасы бастапқы шығыннан екі есе және одан да көбірек болатынын атап өтті.
– Мұнай өндірудің қазіргі әдістерімен ғана шектелмей, заманауи тәсілдерді де қолдану қажет. Ең алдымен, қызметкерлерді озық технологиялармен жұмыс істей білуге үйрету керек, – деді Қазақстан Президенті.
«Самұрық-Қазына» акционерлік қоғамы басқармасының төрағасы Ахметжан Есімов Мемлекет басшысына «Ұлттық индустриялық мұнай химиясы технопаркі» арнайы экономикалық аймағы қызметінің негізгі нәтижелері туралы баяндады.
Сонымен қатар Қазақстан Президентіне Атырау қаласы инженерлік желісінің электронды сызбаларына, ауыл шаруашылығына арналған жерлерге, кең таралған пайдалы қазбалар орындарына және өңірдегі жерлерді пайдалану шарттарына және мемлекеттік қызметке электронды форматта тапсырыс беруге немесе мемлекеттік органға өтініш жолдауға онлайн-мониторинг жасау үшін мүмкіндік туғызатын Атырау облысының геоақпараттық порталының жұмысы таныстырылды.
Атырау облысы әкімінің аппарат басшысы аталған электронды ресурстың енгізілуі өңірдің инвестициялық тартымдылығын арттыруға, бизнес-процесті автоматтандыруға, мемлекеттік қызмет көрсету сапасын жақсартуға, сондай-ақ сыбайлас жемқорлық қатерін және жерді пайдалану шарттарының бұзылуын азайтуға мүмкіндік беретінін айтты.
Жалпы, «Ембімұнайгаз» акционерлік қоғамына қарасты кәсіпорындар жылына 2800 мың тонна мұнай, 170 млн текше метр ілеспе газ өндіреді. Өндірілген өнім негізінен Польша, Германия және Еуропаның өзге де мемлекеттеріне экспортталады.
Кәсіпорын басшыларының мәлімдеуінше, кен орындарын цифрландыру жедел шешім қабылдау мен шығындарды оңтайландыруға мүмкіндік берген. Мәселен, осы үдеріспен қамтылған «УАЗ» кен орнында бұрын аста-төк жұмсалып келген жанар-жағармай 45 процентке дейін үнемделе бастаған. Өндірісті цифрландыру нәтижесінде мұнай-газ ұңғымаларының жай-күйі толық бақылауға алынып, автоматтандырылған жүйе қалыпты мұнай шығындарын 2 процентке дейін қысқартуға, электр энергиясын 37 процентке дейін үнемдеуге жол ашқан.
Соңғы жылдары кәсіпорында бұрынғы оператор мамандықтарына сұраныс төмендеп, керісінше IT саласы мамандарына сұраныс артқан. Бұл – өндіріске жаңа технологиялардың енгізілгендігінің бірден-бір дәлелі.
Өндірістегі игілікті істер туралы Елбасына баяндалып, оң бағасын алғандығын да атап өту керек. Мемлекет басшысы осы бағыттағы жұмыстарды жетілдіру туралы тапсырмалар берді.
Ал өңірдегі заманауи технологияларды кеңінен қолданып отырған «Жігермұнайсервис» жауапкершілігі шектеулі серіктестігінде Елбасы өнім өндіру көлемін, еңбек өнімділігін, металл өңдеу дәлдігін арттыруға, сондай-ақ адам факторына байланысты қателіктерді болдырмауға мүмкіндік беретін, роботтың көмегімен дәнекерлеу әдісі қолданылатын металл құрылғыларын өндірудің технологиялық үдерісімен танысты.
Нұрсұлтан Назарбаевқа зауытта ішкі нарыққа және экспортқа шығаруға арналған дайын өнім үлгілері көрсетілді.
Қазақстан Президенті кәсіпорын еңбеккерлерімен кездесуі барысында өнеркәсіптің түрлі саласында заманауи цифрлы технологияларды енгізудің маңыздылығын атап өтіп, «Жігермұнайсервис» компаниясының өндірісін әртараптандырудың артықшылықтарын айтты.
«Жігермұнайсервис» ЖШС-ның жобалық қуаты – жылына 4000 тонна. Жобаның құны – 2 650 млн теңге. Бүгінде кәсіпорында 49 адам еңбек етеді екен. Кәсіпорын 2017 жылы пайдалануға берілген. Қазіргі уақытта бұрғылау, мұнай кәсіпшілігі және қалыптан тыс құрал-жабдықтарды жалға беру мен жөндеу, мұнай және газ кен орындарын жайғастыру, металл бұйымдары мен бұрғылау жабдықтарын әзірлеу қызметін көрсетеді. Оған қоса нарыққа қоршаулар, баспалдақтар, тіреулер, үрліктер, түрлі көлемдегі контейнерлер мен астаулар, бұрғылау мұнараларын және басқа да металл бұйымдарын шығарады.
Елбасы кәсіпорынның жас қызметкерлерімен де пікірлесіп, оларға бүгінгінің талабы бойынша жастардың бірнеше мамандықты қатар меңгеру қажеттігін, заманауи технология және сапалы біліммен қаруланған адамның аты озатындығын мысал етті.
Мемлекет басшысы Атырау сапарының аясында Х.Досмұхамедов атындағы Атырау гуманитарлық университетіне «ҚазТрансОйл» компаниясы сыйға тартқан жаңа Студенттер үйінің ғимаратымен танысты.
Биылдан бастап студенттер қоныстандырыла бастаған үй заманауи талаптарға сай келеді. Жайықтың жағасына жақын орналасқан ғимаратта студенттердің алаңсыз білім алуына барлық жағдай жасалған. Сәні мен сәулеті келіскен, 450 адамға лайықталған ғимараттың бірінші қабатында заманауи оқу залы, бассейн, асхана және әкімшілік бөлмелер болса, екінші қабатында коворкинг алаңы, спорт және жаттығу залдары қоныс тепкен. Ал жоғарғы қабаттары 17 шаршы метрлік жатын бөлмелерден тұрады. Оған қоса, әрбір ғимаратта жуынатын және тұрмыстық бөлмелер қарастырылған. Студенттер үйі заманауи жиһаздармен жабдықталып, қауіпсіздік шаралары да барынша ескеріліпті.
Студенттер үйінде Мемлекет басшысына өңірде «Рухани жаңғыру» бағдарламасы мен «Президенттің бес әлеуметтік бастамасының» орындалу жайы баяндалды. Облыс әкімі Нұрлан Ноғаевтың мәлімдеуінше, Атырау халқы аталған бағдарламаларды ыстық ықыласпен қабылдап, толық қолдау көрсетуде.
Елбасына осындай жетістіктерді баяндай келе, Н.Ноғаев былтыр және биыл ежелгі Сарайшық қаласын шайып келген Жайық өзенінің 1,5 километрлік жағалауы шегенделгендігіне, басқа да мәдени-тарихи мұраларды сақтап қалуға бағытталған жұмыстарға тоқталды.
Атырау облысында «Президенттің бес әлеуметтік бастамасы» бойынша 1792 пәтерлік 26 тұрғын үй салынып,
«7 – 20 – 25» бағдарламасы арқылы берілмек. Мемлекет басшысы, осы орайда облыс әкіміне әрбір тұрғын үйдің сапалы әрі сәулетті болуын мұқият қадағалауды тапсырды.
Өңірде өткен жылы «Бизнес-Бастау» жобасы арқылы 750 адам оқытылса, биыл бұл жобамен 1325 адам қамтылған.
Сондай-ақ кіріс көлемі 25 айлық есептік көрсеткіштен аспайтын 65 мың адамның жалақысы 1,1 млрд теңгеге өскен.
Ал қазір мұнайлы өңірдегі елді мекендердің 98,3 проценті газдандырылған, қазір тұрба тартылып жатқан Азғыр өңіріне көгілдір отын жеткен бойда бұл көрсеткіш 99 процентке жетпекші.
Сонымен қатар 2020 жылға қарай өңірдегі жатақхана тапшылығы мәселесі түбегейлі шешілмек. Атап айтқанда, осы мезгіл ішінде 1960 орындық 13 жатақхана салынбақ.
Жатақханада тұратын студенттермен әңгімелесу барысында Елбасы оларды үлкенді құрметтеуге, кішіге қамқор болуға шақырып, өз Отанын сүюге негізделген қазақ халқының салт-дәстүрін ұстанудың маңыздылығын айтты. Университет студенттері Бес әлеуметтік бастама аясындағы жобалардың жүзеге асырылғаны және студент жастарға әрдайым қолдау көрсетіп келе жатқаны үшін Нұрсұлтан Назарбаевқа алғыстарын жеткізді.
Мемлекет басшысы жұмыс сапарының қорытындысы бойынша Атырау облысының әлеуметтік-экономикалық даму мәселелері жөнінде кеңес өткізді.
Жиында ашқан Елбасы тәуелсіздік жылдарында Қазақстанның зор жетістікке жеткеніне тоқталып, оған Атырау халқы да айтарлықтай үлес қосқанын ерекше атап өтті.
– Біз 2025 жылға дейінгі Стратегиялық даму жоспарын қабылдадық. «Нұрлы жол», «Нұрлы жер», «Цифрлы Қазақстан», индустриялық-инновациялық даму мемлекеттік бағдарламалары және Бес әлеуметтік бастама жүзеге асырылып жатыр. Мұның бәрі әрбір қазақстандықтың өмірін жақсартуға бағытталған, – деді Нұрсұлтан Назарбаев.
Мемлекет басшысы нысандарды аралап көріп, мемлекеттік бағдарламалардың іске асырылуы жөніндегі есепті тыңдаған соң, жалпы аймақтың экономикасы қарқынды дамып келе жатқанын және әлеуметтік тұрақтылық қамтамасыз етілгенін айтты.
Атырау облысының әкімі биылғы бірінші жартыжылдықтағы өңірдің әлеуметтік-экономикалық даму қорытындылары жөнінде баяндады.
– Облыстың өңірлік жалпы өнімі 2018 жылғы бірінші тоқсанда 1 646,2 миллиард теңгеге, индекс көлемі 112,1 процентке жетті. Республиканың ішкі жалпы өніміндегі өңірдің үлесі 14 процент болды. Өнеркәсіп өндірісінің көлемі 3 653,1 миллиард теңгеге артты. Іс жүзіндегі индекс көлемі – 112,6 процент. Еліміз бойынша өңірдің үлесі 27,7 процентті құрайды. Жыл басынан бері 333,9 мың шаршы метр тұрғын үй пайдалануға берілді. Биыл Кәсіпкерлікті қолдау картасы аясында құны 21,8 миллиард теңге болатын әрі 331 жұмыс орнын ашатын 8 жобаны іске қосу жоспарланып отыр, – деді Нұрлан Ноғаев.
Нұрсұлтан Назарбаев облыстың әлеуметтік-экономикалық дамуының бірқатар бағытына қатысты оң нәтижелерге тоқталып, өңір экономикасы өсімінің негізгі көрсеткіштері өндіруші секторға тиесілі екенін атап өтті.
– Мен бағасы құбылмалы шикізат ресурстарына үміт артпай, баламалы өндіріс құруға арналған индустриялық-инновациялық даму бағдарламасын ұсындым. Үлкен кәсіпорындар құру міндетті емес, экспортқа жұмыс істейтін икемді жобаларды жүзеге асыру қажет, – деді Мемлекет басшысы.
Елбасы мемлекеттік қызметшілердің жалақысына қатысты қанатқақты жобаны жүзеге асырудың тиімділігін айтып, жергілікті атқарушы органдарға осы тәжірибені қолдануды, сондай-ақ сыбайлас жемқорлыққа қарсы күресті күшейтуді тапсырды.
Жиын соңында Қазақстан Президенті облыс әкімдігіне және орталық мемлекеттік органдарға өңір экономикасын әртараптандыру, «Ақтөбе – Атырау
– Астрахань» автомобиль жолының құрылысын тезірек аяқтау, аграрлық және қайта өңдеу саласын дамыту, жаңа жұмыс орындарын ашу, Бес әлеуметтік бастама аясындағы жобаларды сапалы іске асыру, сондай-ақ жүктелген міндеттер үшін басшылардың дербес жауапкершілігін бекіту жөнінде бірқатар тапсырма берді.
Серік ӘБДІБЕК,
«Егемен Қазақстан»
Атырау облысы
