Ал делегация құрамында Түркияның Қазақстандағы елшілігіндегі әскери атташесі, полковник Жюнейт Гюмен, Түрік Республикасы Жандармериясының байланыс және ақпараттық жүйелер басқармасының бастығы генерал-майор Энгин Чырақоғлы мен Азия аймағы бойынша әріптестік жөніндегі бөлім басшысы майор Женгиз Йылмаз да болды.
Әріптестік кездесудің алғашқы күнінде әскери қонақтар Қазақстан Республикасы Ұлттық ұланының Бас қолбасшылығында болып, құқықтық әскердің құрылу тарихымен, оның мақсат-міндеті және құрылымдық ерекшелігімен танысты.
Сондай-ақ делегация басшысы армия генералы Ариф Четиннің Қазақстан Республикасы Ұлттық ұланының бас қолбасшысы генерал-лейтенант Руслан Жақсылықовпен кездесуі барысында Түркияның әскери-оқу орындарында маман даярлау бағыты мен білім беру ісіндегі әріптестікті дамытудың жай-күйі талқыланды. Сонымен қатар осы жылдың шілде айында қазақстандық делегацияның Ыстанбұлда өткен сапарында келісілген бірқатар жетістіктер легін одан әрі жалғастыру жөнінде әңгіме өрбіді.
Естеріңізге сала кетер болсақ, аталған сапар аясында екіжақты әріптестік аясында Қазақстан Республикасы тарапының Түркияның Жандармерия училищесінде білім алушы курсанттарын жыл сайын 8 адамға дейін көбейту келісімі жасалған еді. Оған қоса, тараптар Түркияның әскери-оқу орындарынан түлеп шыққан қазақстандық түлектердің одан әрі Түрік Республикасының академиясында және Түркия оқу орындарындағы арнайы мақсаттағы бөлімшелерде әскери мамандарды даярлау үшін (сұрмергендер мен жарылғыш қару мамандарын, суда жүзу мамандарын, т.б.) оқу курстарын ұзарту жөнінде келісім жасалған болатын.
Делегация өкілдерінің ресми кездесуі соңында армия генералы Ариф Четин Қазақстан Республикасы Ұлттық ұланы Бас қолбасшылығы ғимаратының аумағында «Достық аллеясын» ашып, онда алғашқы ағашты отырғызды.
Содан кейінгі ресми сапар Тұңғыш Президент – Елбасы атындағы Ұлттық қорғаныс университетінде жалғасты. Мұнда қонақтар университеттің оқу-әдістемелік базасы мен материалдық әлеуетімен танысып, музейді аралады. Сонымен қатар имитациялық модельдеу орталығы мен Қазақстан Қарулы Күштері Бас штабы академиясы мен Ұлттық ұланның біліктілікті арттыру факультетінің жұмысымен танысты.
Ресми сапардың екінші күнінде Қазақстан Республикасының Ішкі істер министрі генерал-полковник Қалмұханбет Қасымовтың Ариф Четинмен кездесуі өтіп, онда ынтымақтастықты тереңдету мен белсенді жүргізуге ықылас танытылды. Сонымен қатар құқық қорғау саласындағы қарым-қатынас деңгейінің болашақтағы бағыт-бағдары нақтыланды.
Одан әрі түркиялық әскерилер Арнайы жедел мақсаттағы астаналық бригаданың материалдық-техникалық жағдайымен, әскерилердің тұрмысымен танысып, әскери қару-жарақ көрмесін тамашалады. Делегация өкілдері сапардың соңғы түйіні ретінде елордадағы Мұстафа Кемал Ататүрік атындағы саябаққа барып, ескерткішке гүл шоқтарын қойды.
«Егемен-ақпарат»